গুৱাহাটী, 14 অক্টোবৰ : প্ৰতিমুহুৰ্তে ৰাজ্যৰ প্ৰতিবন্ধী লোকসকলক মাহী আইৰ দৃষ্টিৰে চাই আহিছে ৰাজ্য চৰকাৰে ৷ বাৰে বাৰে প্ৰতিবন্ধী সকলক তেওঁলোকৰ প্ৰাপ্যৰ পৰা বঞ্চিত কৰি অহা হৈছে ৷ এই অভিযোগ প্ৰতিবন্ধী সমাজ অসমৰ সাধাৰণ সম্পাদক নৃপেন মালাকাৰৰ ৷
উল্লেখ্য যে, শেহতীয়াকৈ ৰাজ্যৰ জলসিঞ্চন বিভাগৰ কণিষ্ঠ সহায়ক আৰু চেকচন এচিষ্টেণ্টৰ নিযুক্তিৰ বাবে দিয়া ৬৪৩ টা বিজ্ঞাপন প্ৰকাশ কৰিছিল ৷ ইয়াৰে চেকচন এচিষ্টেণ্ট পদৰ বাবে খালী দেখুওৱা ৩৯৭ টা পদৰ লিখিত পৰীক্ষা অনুষ্ঠিত কৰাৰ পাছত সোমবাৰে ঘোষণা কৰিলে চেকচন এচিষ্টেণ্টৰ ৩৯৭ টা পদৰ ফলাফল ৷ তাৎপৰ্যপূৰ্ণ কথা যে,পদসমূহৰ বাবে বিজ্ঞাপন প্ৰকাশ হোৱাৰ পাছতেই প্ৰতিবন্ধী সমাজে ৰাজ্যৰ প্ৰতিবন্ধী সকলৰ বাবেও আসন সংৰক্ষণৰ বাবে দাবী জনাই আদালতৰ দ্বাৰস্থও হৈছিল ৷ আদালতে তেওঁলোকৰ দাবীৰ প্ৰতি সমৰ্থন জনাই জলসিঞ্চন বিভাগক খালি দেখুওৱা মুঠ পদৰ ৪ শতাংশ প্ৰতিবন্ধী সকলৰ বাবে সংৰক্ষিত কৰিবলৈ নিৰ্দেশনা জাৰি কৰে ৷ এই নিৰ্দেশনাৰ পাছতেই বিভাগে পুনৰ খালী দেখুওৱা মুঠ পদৰ ৪ শতাংশ আসন প্ৰতিবন্ধী সকলৰ বাবে সংৰক্ষিত কৰি ৰখা বুলি বিজ্ঞাপন প্ৰকাশ কৰিলে ৷ সেই অনুসৰি জলসিঞ্চন বিভাগে অনুষ্ঠিত কৰিলে জলসিঞ্চন বিভাগৰ মুঠ ৩৯৭ টা চেকচন এচিষ্টেণ্ট পদৰ লিখিত পৰীক্ষাও ৷
কিন্তু সোমবাৰে ঘোষণা কৰা ফলাফল অনুসৰি চেকচন এচিষ্টেণ্ট পদৰ বাবে সংৰক্ষিত প্ৰতিবন্ধী সকলৰ আসন সমূহ নিৰ্দিষ্টকৈ প্ৰকাশ নকৰাত ক্ষুব্ধ হৈ পৰিছে প্ৰতিবন্ধী সমাজ ৷ তেওঁলোকৰ অভিযোগ ৰাজ্য চৰকাৰে প্ৰতিবাৰে প্ৰতিবন্ধী লোকসকলক তেওঁলোকৰ ন্যায্য প্ৰাপ্যৰ পৰা বঞ্চিত কৰি ৰাখিছে ৷ কেৱল মাত্ৰ জলসিঞ্চন বিভাগতেই নহয়, ৰাজ্যৰ অন্যান্য বিভাগসমূহৰ খালী পদসমূহ পূৰণৰ ক্ষেত্ৰতো প্ৰতিবন্ধী সকলক মাহী আইৰ দৃষ্টিৰে চাই বুলি গুৰুতৰ অভিযোগ উত্থাপন কৰিলে প্ৰতিবন্ধী সমাজে ৷
তেওঁলোকৰ দাবী আগন্তুক দিনত চৰকাৰে প্ৰতিবন্ধী সকলৰ নিযুক্তিৰ ক্ষেত্ৰত বিশেষ ব্যৱস্থা গ্ৰহণ নকৰিলে জংগী আন্দোলন গঢ়ি তোলা হ’ব আৰু তাৰ বাবে জগৰীয়া হ’ব ৰাজ্য চৰকাৰ ৷
লগতে পঢ়ক: শাৰদীয় দুৰ্গোৎসৱৰ প্ৰাকক্ষণত ৰাজ্যৰ শেহতীয়া পৰিস্থিতি পৰ্যালোচনা মুখ্যমন্ত্ৰীৰ
