গুৱাহাটী, 22 নৱেম্বৰ : পুনৰ গুৱাহাটী মহানগৰীত চুপাৰি ব্যৱসায়ীৰ হাতৰ পৰা উদ্ধাৰ হ’ল ডেৰ কোটিতকৈয়ো অধিক টকা ৷ সচৰাচৰ হোৱাৰ দৰে মহানগৰীৰ ব্যস্ত ব্যৱসায়িক অঞ্চল আঠগাঁৱৰ পৰাই এই বিশাল পৰিমাণৰ ধনখিনি উদ্ধাৰ কৰা হয় ৷ আঠগাঁৱৰ এম এছ ৰোডত অভিযান চলাই আয়কৰ বিভাগে এই ধনখিনি উদ্ধাৰ কৰাৰ লগতে এটা আন্তঃৰাষ্ট্ৰীয় হাৱালা চক্ৰকো উৎখাত কৰে ৷ সন্দেহ কৰা হৈছে, এই হাৱালা চক্ৰটোৱে বিগত দীৰ্ঘসময় ধৰি এইদৰে বেআইনীভাৱে কোটি কোটি টকাৰ লেনদেন কৰি আহিছিল ৷
আয়কৰ বিভাগে অভিযান চলাই এম এছ ৰোডত উৎখাত কৰা এই চক্ৰটোৰ সৈতে জড়িত দুজন লোককো আটক কৰে ৷ লোক দুজন হৈছে ৰাজস্থানৰ দেৱকৰণ সেন (27) আৰু মনোজ কুমাৰ (47) ৷ দুয়োৰে পৰা উদ্ধাৰ কৰা ধনৰ পৰিমাণ হৈছে প্ৰায় 1,69,70,000 টকা ৷ আশ্চৰ্যজনক কথাটো হ’ল আঠগাঁৱৰ এম এছ ৰোডৰ জমীৰ আহমেদ নামৰ লোকজনৰ ঘৰৰ দ্বিতীয় মহলাত ভাড়াতীয়া হিচাপে আছিল ৰাজস্থানৰ এই লোক দুজন ৷ এই ঘৰটোৰ পৰাই সুদীৰ্ঘ সময় ধৰি দুয়োৱে চলাই গৈছিল চাহপাত আৰু চুপাৰিৰ ব্যৱসায় ৷
আৰক্ষীৰ জেৰাত দুয়োৱে বহুখিনি কথাই স্বীকাৰ কৰিছে যদিও প্ৰায় এক কোটি সত্তৰ লাখ টকা কিয় এনেদৰে মজুত কৰি ৰাখিছিল তাৰ কোনো সদুত্তৰ দিব পৰা নাই লোক দুজনে ৷ কি উৎসৰ পৰা এই বৃহৎ ধনৰাশি আহিছিল বা এই ধন ক’ত ব্যৱহাৰ কৰা হ’লহেতেন তাৰো কোনো বিশ্বাসযোগ্য উত্তৰ তেওঁলোকৰ হাতত নাই ৷ প্ৰাথমিক জেৰা আৰু অনুসন্ধানত আৰক্ষী আৰু আয়কৰ বিভাগে সন্দেহ কৰিছে যে, এই চক্ৰটোৱে দীঘলীয়া সময় ধৰি হাৱালাৰ জৰিয়তে ধনৰ লেনদেন কৰি আহিছিল ৷ কেৱল এই দুজন লোকেই নহয়, চক্ৰটোৰ সৈতে আৰু বহু লোক জড়িত থকাৰ সন্দেহ কৰিছে আয়কৰ বিভাগে ৷ ভৰলুমুখ আৰক্ষীৰ সহযোগত প্ৰায় দহ ঘণ্টাজুৰি চলোৱা অভিযানত এই ধনখিনি উদ্ধাৰ কৰা হয় ৷
লগতে পঢ়ক : এ পি এছ চি কেলেংকাৰী: বক্ৰ পথেৰে চাকৰি লোৱা ৩৪ ৰাজপত্ৰিত বিষয়াক আটক
