গুৱাহাটী, 31 অক্টোবৰঃ শ্ৰীমন্ত শংকৰদেৱ কলাক্ষেত্ৰত বৃহস্পতিবাৰৰ পৰা আৰম্ভ হয় গুৱাহাটী আন্তঃৰাষ্ট্ৰীয় চলচ্চিত্ৰ মহোৎসৱ । গুৱাহাটী আন্তঃৰাষ্ট্ৰীয় চলচ্চিত্ৰ মহোৎসৱত মুখ্য অতিথি হিচাপে উপস্থিত থাকে পোলেণ্ডৰ ছবি নিৰ্মাতা ক্ৰিষ্টোফি জানুচি ৷ মমবাটি প্ৰজ্বলনেৰে মহোৎসৱ উদ্ধোধন কৰে মুখ্যমন্ত্ৰী সৰ্বানন্দ সোণোৱালে ৷ মুখ্যমন্ত্ৰীৰ লগতে উপস্থিত থাকে মন্ত্ৰী নৱ কুমাৰ দলে, অভিনেতা আদিল হুছেইন, ছবি পৰিচালক মধুৰ ভাণ্ডাৰকাৰকে আদি কৰি বহুকেইজন ।
অসমৰ ভোৰতাল নৃত্যৰে আৰম্ভনি কৰা হয় তৃতীয় বাৰ্ষিক গুৱাহাটী আন্তঃৰাষ্ট্ৰীয় চলচ্চিত্ৰ মহোৎসৱ । মহোৎসৱত উপস্থিত থকা সকলোকে আদৰণি জনায় পবিত্ৰ মাৰ্ঘেৰিটাই । মুখ্যমন্ত্ৰী সৰ্বানন্দ সোনোৱালে গুৱাহাটীত আন্তঃৰাষ্ট্ৰীয় চলচ্চিত্ৰ মহোৎসৱ অনুষ্ঠিত হোৱাটো অসমীয়া ছবি জগতৰ বাবে এক শুভ লক্ষণ বুলি জানিবলৈ দিয়ে । অসমৰ মনোমোহা পৰিবেশে ছবি নিৰ্মাতা সকলক আকৃষ্ট কৰিব বুলি কোৱাৰ লগতে অসমৰ সুপ্ত প্ৰতিভাই এখন আন্তঃৰাষ্ট্ৰীয় মঞ্চ পাবলৈ সক্ষম হ'ব বুলি মত পোষণ কৰে মুখ্যমন্ত্ৰীগৰাকীয়ে ।
প্ৰথমবাৰৰ বাবে অসমলৈ অহা ছবি নিৰ্মাতা মধুৰ ভাণ্ডাৰকাৰে অসমৰ প্ৰাকৃতিক পৰিৱেশ, সংস্কৃতিৰ লগতে খাদ্য সম্ভাৰৰ প্ৰতি আকৰ্ষিত হোৱাৰ কথা জানিবলৈ দিয়ে । তেওঁ কয় যে অসমত প্ৰতিভাৰ অভাৱ নাই ।
গুৱাহাটী আন্তঃৰাষ্ট্ৰীয় চলচ্চিত্ৰ মহোৎসৱ অসমত তৃতীয় বাৰৰ বাবে অনুষ্ঠিত হোৱাত আদিল হুছেইনে সন্তুষ্টি প্ৰকাশ কৰিছে । অসমত ভাল ছবি নিৰ্মাণ হোৱাৰ লগতে ৰিমা দাসৰ ছবিক লৈ গৌৰৱ বোধ কৰে তেওঁ । তেওঁ কয় যে, মানুহে ভাল ছবি চাব লাগে । লগতে বাণিজ্যকভাবে সফল ছবি ৰত্নাকৰক শুভেচ্ছা জনোৱাৰ লগতে ছবিখন চোৱাৰ সুযোগ এতিয়া লৈ লাভ কৰা নাই বুলি জানিবলৈ দিয়ে তেঁও ।
উল্লেখযোগ্য যে, 31 অক্টোবৰৰ পৰা আৰম্ভ হোৱা গুৱাহাটী আন্তঃৰাষ্ট্ৰীয় চলচ্চিত্ৰ মহোৎসত অহা 6 নৱেম্বৰ লৈ প্ৰতি দিনে 16 খন ছবি উপভোগ কৰিবলৈ পাব দৰ্শকে ।
