গুৱাহাটী,4 ছেপ্টেম্বৰ: গুৱাহাটী মহানগৰীৰ লগতে ৰাজ্যৰ বিভিন্ন স্থানত বিগত বৰ্ষৰ লকডাউনৰ পৰা আৰ্থিক সমস্যাৰ বাবে উদ্বেকজনক ভাৱে বৃদ্ধি পাইছে পৰিয়াল কেন্দ্ৰিক বিবাদৰ সংখ্যা ৷ অৰ্থনৈতিক সমস্যা, ঘৰুৱা হিংসা, অবৈধ সম্পৰ্ক, পৰস্পৰে পৰস্পৰ মাজত বুজা বুজি নথকা, নিচাজাতীয় দ্ৰব্য সেৱন, যৌতুকৰ দাবী আদিক কেন্দ্ৰ কৰিয়েই এই পৰিয়ালকেন্দ্ৰীক বিবাদৰ ঘটনা সমূহ সংঘটিত হৈ আহিছে ৷ কিন্তু আশ্চৰ্যজনক ভাৱে শেহতীয়াকৈ অৰ্থনৈতিক কাৰণত বৃদ্ধি পাইছে পৰিয়াল কেন্দ্ৰিক বিবাদ ৷
অসম প্ৰাদেশিক মহিলা সমিতিৰ পৰিয়াল পৰামৰ্শ কেন্দ্ৰৰ পৰা পোৱা তথ্য অনুসৰি চলিত বৰ্ষৰ জানুৱাৰীৰ পৰা আগষ্টলৈ 94 টা পৰিয়ালকেন্দ্ৰিক ঘটনা সংঘটিত হৈছে ৷ অৰ্থনৈতিক সমস্যা, অবৈধ সম্পৰ্ক, পৰস্পৰে পৰস্পৰৰ মাজত বুজাবুজি নথকাৰ বাবে অধিক সংখ্যক পৰিয়ালকেন্দ্ৰিক ঘটনা সংঘটিত হৈছে ৷ পৰিয়াল পৰামৰ্শ কেন্দ্ৰটোৰ পৰা পোৱা তথ্য অনুসৰি, 2020 চনত 125 টা আৰু 2021 ৰ আগষ্টলৈ 94 টা পৰিয়াল কেন্দ্ৰিক বিবাদৰ ঘটনা সংঘটিত হৈছে ৷
কেন্দ্ৰটোৰ কাউঞ্চিলাৰ ৰুণতি গগৈ আৰু মন্দাকিনী বৰগোহাঁই জনোৱা মতে, কেন্দ্ৰটোলৈ বিভিন্ন সমস্যাৰ বাবে সংঘটিত হোৱা পৰিয়ালকেন্দ্ৰক বিবাদৰ ঘটনা লৈ বহু লোক আহে ৷ কিন্তু যোৱা বৰ্ষ লকডাউনৰ পৰা ক'ভিড কালত আৰ্থিক সমস্যাৰ বাবে পৰিয়াল কেন্দ্ৰিক বিবাদৰ সংখ্যা বৃদ্ধি পাইছে ৷
তেঁওলোকে জনোৱা মতে,বহু লোকে আৰ্থিক সমস্যাৰ বাবে সংঘটিত হোৱা পৰিয়াল কেন্দ্ৰিক বিবাদৰ সমাধান বিচাৰি কেন্দ্ৰটোলৈ আহিছে ৷ তদুপৰি অবৈধ সম্পৰ্কৰ লগতে পৰস্পৰে পৰস্পৰ লগত বুজাবুজি নোহোৱাৰ বাবে সংঘটিত হোৱা পৰিয়ালকেন্দ্ৰিক বিবাদৰ ঘটনা কেইবাটাও কেন্দ্ৰটোলৈ আহিছে ৷ আনহাতে যৌতুকৰ বাবে সংঘটিত হোৱা পৰিয়াল কেন্দ্ৰীক বিবাদৰ সংখ্যা কম ৷ মহানগৰীৰ বিভিন্ন স্থানৰ পৰা লোক আহে যদিও বামুনিমৈদান, নাৰেংগী আদি অঞ্চলৰ পৰা বহু লোক কেন্দ্ৰটোলৈ আহে ৷
লগতে পঢ়কঃ নাৰীৰ দালালৰ পৰা দুগৰাকী কিশোৰী উদ্ধাৰ কৰিলে সাহসী মহিলা আৰক্ষী বিষয়াই
ইয়াৰোপৰি বৰপেটা, নলবাৰী, হাজো, শুৱালকুছি, নগাঁও আদি অঞ্চলৰ পৰাও বহু লোক এই কেন্দ্ৰটোলৈ আহে৷ কেন্দ্ৰটোৰ তথ্য অনুসৰি 2013-14 চনত পৰিয়ালকেন্দ্ৰিক বিবাদৰ সংখ্যা আছিল 53 টা, 2014-25 চনত 27 টা, 2015-16 চনত 66 টা, 2016-17 চনত 160 টা, 2017-18 চনত 180 টা,2018-19 ৰ জানুৱাৰীলৈ 145 টা আৰু 2019 ৰ ফেব্ৰুবাৰীৰ পৰা ডিচেম্বৰলৈ 132 টা পৰিয়াল কেন্দ্ৰিক বিবাদৰ ঘটনা কেন্দ্ৰটোলৈ আহিছে ৷
লগতে পঢ়কঃ ৰাজ্য চৰকাৰৰ চাৰিমহীয়া কাৰ্যকালত স্বাস্থ্য খণ্ডত ১,৯৪১ টা পদত নিযুক্তি : কেশৱ মহন্ত
