গুৱাহাটী, ১৪ অক্টোবৰঃ '৮০ ৰ দশকত গোৱালপাৰাৰ পৰা আহি গুৱাহাটীত নাটক কৰিবলৈ লোৱা যুৱকজনৰ পৰিচয় এতিয়া বিশ্বব্যাপী । গুৱাহাটীৰ পৰা গৈ প্ৰথমে বলিউড আৰু তাৰ পিছত এতিয়া এইগৰাকী সুযোগ্য অসম সন্তানে খোজ পেলাবলৈ সক্ষম হৈছে হলিউডত । হলিউডৰ জনপ্ৰিয় তথা বিখ্যাত চিৰিজ " ষ্টাৰ ট্ৰেক - ছিজন থ্ৰি " ত অভিনয় কৰিবলৈ সুযোগ পোৱা এইগৰাকী অভিনেতাৰ নাম আদিল হুছেইন । " ষ্টাৰ ট্ৰেক " ত কাম কৰিবলৈ সুযোগ পোৱা আদিল হুছেইন হৈছে দ্বিতীয়গৰাকী ভাৰতীয় অভিনেতা আৰু প্ৰথমগৰাকী অসমীয়া । ইয়াৰ পূৰ্বে " ষ্টাৰ ট্ৰেক " ত অভিনয় কৰা প্ৰথমগৰাকী ভাৰতীয় আছিল পাৰ্চিছ খাম্বাটা ।
সম্প্ৰতি আদিল হুছেইন ব্যস্ত হলিউডত । সমান্তৰাল ভাৱে কাম কৰি গৈছে বলিউডৰ ছবিৰ লগতে অন্যান্য ভাৰতীয় ভাষাৰ ছবিতো । আদিল অভিনীত দুখনকৈ ছবি " ৰাহগীৰ " আৰু " নিৰ্বাণা ইন " ইতিমধ্যে বুছান চলচ্চিত্ৰ মহোৎসৱলৈ নিৰ্বাচিত হৈছে। আমেৰিকান প্ৰডাক্সনৰ আন এখন ছবি " ইল্লিগেল " শীঘ্ৰে আহি আছে ভাৰতৰ ছবিগৃহলৈ , য'ত এটা গুৰুত্বপূৰ্ণ চৰিত্ৰত অভিনয় কৰিছে আদিল হুছেইনে । সবাতোকৈ ডাঙৰ তথা ভাল খবৰটো হ'ল- আদিল হুছেইনে খুব সোনকালেই পৰিচালনা কৰিব এখন অসমীয়া ছবি । সম্প্ৰতি ছবিখনৰ স্ক্ৰীপ্টৰ কাম চলি আছে। এই সকলো কথা শুনক আদিল হুছেইনৰ নিজৰ মুখেৰে । বৰ্তমান হলিউডত ব্যস্ত থকা আদিল হুছেইনৰ সৈতে ই টিভি ভাৰতৰ জ্যেষ্ঠ সাংবাদিক গৌতম বৰুৱাৰ এক EXCLUSIVE টেলিফ'নিক সাক্ষাৎকাৰ ।
