গুৱাহাটী, ২২ নৱেম্বৰ : গুৱাহাটীত বন্ধ হৈ পৰিল কেব সেৱা । অ'লা আৰু উবেৰ চালকে ২৪ ঘণ্টাৰ বাবে বন্ধ ৰাখিলে এই সেৱা । অ'লা-উৱেৰ কোম্পানীয়ে দীৰ্ঘদিনে চলাই অহা শোষণৰ বিৰুদ্ধে প্ৰতিবাদস্বৰূপে কেব চালকসকলৰ এই প্ৰতিবাদ । চালকসকলে তেওঁলোকৰ দীৰ্ঘদিনীয়া সমস্যা সমাধানৰ দাবীত মঙলবাৰে মহানগৰীত ২৪ ঘণ্টাৰ বাবে বন্ধ ৰাখিলে অ'লা আৰু উবেৰ সেৱা ।
অল আছাম কেব অপাৰেটৰ্ছ ইউনিয়ন (All Assam Cab operators Union) আৰু অল গুৱাহাটী কেব ড্ৰাইভাৰ ইউনিয়নৰ (All Guwahati Cab Driver Union) আহ্বানত চালকসকলে সমগ্ৰ গুৱাহাটীতে বন্ধ ৰাখে অ'লা আৰু উবেৰ সেৱা । প্ৰায় ৮০ শতাংশ অ'লা-উবেৰ চালকে বন্ধ ৰাখিছে সেৱা (Cab drivers strike in Guwahati)। অল আছাম কেব অপাৰেটৰ্ছ ইউনিয়নৰ সভাপতি বিষ্ণু দাসে এই প্ৰতিবাদ সন্দৰ্ভত কয় যে অ'লা-উবেৰ কোম্পানীয়ে চালকসকলৰ ওপৰত দীৰ্ঘদিনে চলাই আহিছে শোষণ ।
কোম্পানীসমূহে কমিচন হিচাপে প্ৰতিটো ভাড়াৰে ২০ শতাংশ লোৱাৰ বাবে চুক্তিবদ্ধ হৈছিল কিন্তু সম্প্ৰতি অ'লা উবেৰ কোম্পানীবোৰে নিজৰ খেয়াল-খুচি মতে কমিচন লৈ আহিছে । প্ৰতিটো ভাড়াৰ বিপৰীতে ২০ শতাংশৰ পৰা ৫০ শতাংশ পৰ্যন্ত কমিচন লৈ আহিছে কোম্পানীবোৰে । যাৰ বাবে সমস্যাত পৰিছে অ'লা-উবেৰ চালকসকল । তদুপৰি লকডাউনৰ পিছৰে পৰা জধেমধে উবেৰ চালকসকলৰ একাউণ্ট বন্ধ কৰি আহিছে কোম্পানীয়ে ।
বৰ্তমানলৈ প্ৰায় ৫০০ তকৈ অধিক একাউণ্ট কোম্পানীয়ে বন্ধ কৰিছে । এই সকলোবোৰ সমস্যা সমাধানৰ বাবে বহুবাৰ অ'লা উবেৰ-কোম্পানীবোৰক আহ্বান জনোৱাৰ লগতে পৰিবহণ বিভাগকো বিহিত ব্যৱস্থা গ্ৰহণ কৰিবলৈ আহ্বান জনোৱা হৈছিল । কিন্তু আজি পৰ্যন্ত কোনো সমস্যা সমাধান নহ'ল । সেয়েহে মঙলবাৰে কেব চালকসকলে প্ৰতিবাদ সাব্যস্ত কৰিছে (Cab driver protest in Guwahati)।
অতি শীঘ্ৰে সমস্যা সমাধান নকৰিলে কেব চালকসকলে ধাৰাবাহিকভাৱে প্ৰতিবাদ সাব্যস্ত কৰাৰো হুংকাৰ দিছে । উল্লেখ্য যে সম্প্ৰতি মহানগৰীত প্ৰায় ৮ হাজাৰ অ'লা আৰু উবেৰে দৈনিক গ্ৰাহকক সেৱা আগবঢ়াই আহিছে ।
লগতে পঢ়ক :Jihadi in Nagaon : জেহাদীৰ সন্দেহত নগাঁৱত এজনক আটক
