দক্ষিণ কামৰূপ, 11 জানুৱাৰী: সোমবাৰে সন্ধিয়া গুৱাহাটীত উপস্থিত হ'ল বিজেপিৰ ৰাষ্ট্ৰীয় সভাপতি জে পি নাড্ডা । শিলচৰৰ পৰা বিমানযোগে গুৱাহাটী বৰঝাৰ বিমানবন্দৰত উপস্থিত হয় বিজেপিৰ সভাপতিগৰাকী । বিমানবন্দৰতে বিজেপি নেতৃবৰ্গই উষ্ম আদৰণি জনাই জে পি নাড্ডাক । বিজেপিৰ ৰাষ্ট্ৰীয় সভাপতি জে পি নাড্ডাক অসমৰ বিভিন্ন কৃষ্টি সংস্কৃতিৰে বিমানবন্দৰৰ পৰা আদৰণি জনোৱা হয় ।
উল্লেখ্য যে,শিলচৰৰ পুলিচ পেৰাড গ্ৰাউণ্ডত এখন সভাত অংশগ্ৰহণ কৰি লোকপ্ৰিয় গোপীনাথ বৰদলৈ আন্তৰ্জাতিক বিমান বন্দৰত অৱতৰণ কৰে ৰাষ্ট্ৰীয় সভাপতিগৰাকীয়ে । বিমানবন্দৰৰ পৰা আমিনগাঁওৰ PWDৰ পৰিদৰ্শন বাংলালৈ ৰাওনা হয় বিজেপি নেতাগৰাকী । পৰিদৰ্শন বাংলাতে অসম প্ৰদেশৰ শীৰ্ষ কাৰ্যকর্তাৰ লগত দলৰ সাংগঠনিক সভাত অংশগ্ৰহণ কৰিব জে পি নাড্ডাই । কাইলৈ সভাপতি গৰাকীয়ে কামাখ্যা মন্দিৰ ভ্ৰমণ কৰাৰ সম্ভাৱনা আছে ।
লগতে পঢ়ক: 126 টা সমষ্টিতে প্ৰাৰ্থী নিক্ষেপ কৰিব অসম জাতীয় পৰিষদেঃ জগদীশ ভূঞা
