মিৰ্জা, ১৩ নৱেম্বৰ: ৰাজ্যৰ আন প্ৰান্তৰ লগতে শালি ধানৰ খেতিৰ বাবে বিখ্যাত পশ্চিম গুৱাহাটীৰ ৰাণী অঞ্চলৰ পথাৰত এতিয়া শূঁৰ পোকৰ ত্ৰাস । নিশাটোৰ ভিতৰতে শ শ বিঘা ধাননি পথাৰ নষ্ট হৈছে । শূঁৰ পোকে কৃষকৰ কাঢ়িছে টোপনি । ফলত হতাশাত ভুগিছে কৃষক ৰাইজ । উল্লেখ্য যে এতিয়া কৃষকে হাড়ভঙা পৰিশ্রম কৰি পথাৰত ৰোপণৰ কৰা শস্যৰ ফল ধৰা বতৰ । সেউজীয়া ধাননি পথাৰে সোণালী ৰূপ লোৱাৰ সময় । এই সময়ত কৃষকৰ মুখত হাঁহি বিৰিঙে । কিন্তু এতিয়া ৰাণীৰ কৃষকৰ চকুত চকুলো ।
একোখন পথাৰ তহিলং কৰি বিস্তৰভাৱে নষ্ট কৰিছে ধান । ৰাণী অঞ্চলৰ পুৰাণ শুকুৰবৰীয়া বিক্ৰমপুৰকে ধৰি একাংশ কৃষকে উল্লেখ কৰা মতে, এই পোকটোৱে দিনতকৈ নিশাহে ধানৰ থোকৰ ওপৰত আক্রমণ চলায় । নিশাৰ ভাগত শূঁৰ পোকে ধানৰ থোক কাটি কৃষকৰ নিদ্ৰাহৰণ কৰিছে । এনে এক পৰিস্থিতিৰ উদ্ভৱ হৈছে যে বহু কৃষকে ধাননি পথাৰৰ পৰা শস্য চপাই ঘৰলৈ নিয়াৰ সম্ভাৱনা নোহোৱা কৰি পেলাইছে শূঁৰ পোকে ।
পশ্চিম গুৱাহাটীৰ ৰাণী অঞ্চলৰ কৃষকে এইক্ষেত্ৰত কৃষি বিভাগে কোনো গুৰুত্ব প্ৰদান নকৰাৰ অভিযোগ উত্থাপন কৰিছে ৷ দুখীয়া খেতিয়কসকলৰ সীমাহীন ক্ষতিসাধন হোৱাৰ পিছতো কিন্তু কৃষি বিভাগৰ কোনো বিষয়া-কৰ্মচাৰী তথা গ্ৰামসেৱকে কৃষকৰ খবৰ ল'বলৈ আহৰি পোৱা নাই খেতিয়কসকলৰ । গ্ৰামসেৱকসকলে খেতিয়কৰ কোনো সমস্যা সমাধান নকৰি ঘৰত বহি কেৱল চৰকাৰী ধন লৈ আছে বুলি অভিযোগ কৰে খেতিয়ক সকলে ৷ কৃষকসকলে হুমুনিয়াহ কাঢ়ি কয় যে হাজাৰ হাজাৰ টকা খৰচ কৰি খেতি কৰিলে যদিও ধান চপোৱাৰ সময়তে শূঁৰ পোকে অনিষ্ট কৰি তেওঁলোকৰ সপোণ মষিমূৰ কৰিলে । তেওঁলোকে চৰকাৰক এইক্ষেত্ৰত পদক্ষেপ গ্ৰহণ কৰিবলৈ আহ্বান জনাইছে ৷
