গুৱাহাটী, ২২ জুনঃ চাবুৱা থানাৰ 'নিয়া'(NIA)ৰ গোচৰত চার্জ শুনানিৰ অন্তত ৰেহাই পালে অখিল গগৈয়ে । 'নিয়া'ৰ বিশেষ আদালতত হোৱা মঙলবাৰৰ শুনানিত অখিল গগৈৰ লগতে জগজিৎ গোহাঁই আৰু ভূপেন গগৈক দোষমুক্ত কৰিলে আদালতে । চাবুৱা থানাৰ গোচৰৰ সকলো অভিযোগৰ পৰা ৰেহাই দিয়া হ'ল তিনিওজনকে । অৱশ্যে চানমাৰি থানাৰ গোচৰটোৰ শুনানী এতিয়াও চলি আছে ।
ইফালে অখিল গগৈক মাতৃক সাক্ষাৎ কৰিবৰ বাবে অনুমতি বিচাৰি আজি অদালতত আবেদন জনোৱা হৈছে । ৫৫ পৃষ্ঠাৰ অৰ্ডাৰ পাছ কৰিছে আদালতে। একেদৰে চাবুৱা থানাৰ গোচৰ সন্দৰ্ভত আন এজন অভিযুক্ত ভাস্কৰজ্যোতি ফুকনে ৰেহাই নাপালে । তেওঁৰ গোচৰৰ শুনানি ডিব্ৰুগড়ৰ আদালতত চলিব ৷ আনহাতে নিয়াই আৰোপ কৰা সকলো অভিযোগৰ পৰা ৰেহাই পালে অখিল গগৈয়ে ।
বে-আইনী কাৰ্যকলাপ প্ৰতিৰোধ আইনৰ অধীনত অভিযুক্ত আছিল অখিল গগৈ । আজি আদালতে অখিল গগৈক সকলো অভিযোগৰ পৰা মুক্ত কৰে । হত্যাৰ চেষ্টাৰ অভিযোগৰ পৰাও মুক্ত হ'ল অখিল গগৈ । আনহাতে চাবুৱাৰ গোচৰৰ পৰা অখিল গগৈ মুক্ত হলেও ন্যায়িক জিন্মাতেই থাকিব লাগিব । চানমাৰি থানাৰ নিয়াৰ গোচৰটোত এতিয়াও জামিন পোৱা নাই অখিল গগৈয়ে । দুই-এদিনতে এই গোচৰৰ শুনানি হ'ব ।
আজিৰ শুনানি সন্দৰ্ভত সংবাদ মাধ্যমৰ আগত সবিশেষ ব্যক্ত কৰিলে অধিবক্তা কৃষ্ণ গোঁহায়ে ৷ উল্লেখ্য যে, আজি অৰ্থাৎ মঙলবাৰে কটকটীয়া নিৰাপত্তা বেষ্টনীৰ মাজত ৰাইজৰ দলৰ সভাপতি বিধায়ক অখিল গগৈক 'নিয়া' ৰ বিশেষ আদালতত হাজিৰ কৰোৱা হয় । গুৱাহাটী চিকিৎসা মহাবিদ্যালয় হাস্পতালৰ পৰা নিয়াৰ আদালতলৈ অনা হয় অখিল গগৈক । চানমাৰি আৰু চাবুৱা থানাৰ নিয়াই তদন্ত কৰি থকা দুটা গোচৰ সন্দৰ্ভত আজি আদালতে চাৰ্জ অৰ্ডাৰ দিয়াৰ সম্ভাৱনা আছিল ।
মন কৰিব লগীয়া যে, ২০১৯ চনৰ ১২ ডিচেম্বৰত গ্ৰেপ্তাৰ হোৱা অখিল গগৈৰ বিৰুদ্ধে ৰাজ্যৰ বহু কেইখন থানাত বহুকেইটা গোচৰ ৰুজু হৈ আছে । ইতিমধ্যে বহুকেইটা গোচৰত অখিল গগৈয়ে জামিন লাভ কৰিছে যদিও নিয়াই তদন্ত কৰি থকা চাবুৱা থানাৰ গোচৰত তেওঁ জামিন লাভ কৰা নাছিল । বিগত ডেৰ বছৰ ধৰি কাৰাবন্দী হৈ থকা অখিল গগৈক বিভিন্ন গোচৰত কেইবাবাৰো কাৰাগাৰতে গ্ৰেপ্তাৰ কৰা হৈছে ।
লগতে পঢ়কঃ NIA ৰ বিশেষ আদালতত অখিল গগৈ
