গুৱাহাটী, ১৮ ডিচেম্বৰ: কেন্দ্ৰীয় গৃহমন্ত্ৰী অমিত শ্বাহৰ উপস্থিতিত ৰাজ্যৰ জ্যেষ্ঠ কংগ্ৰেছ নেত্ৰী তথা প্ৰাক্তন মন্ত্ৰী অজন্তা নেওগে বিজেপিত যোগ দিবলৈ সাজু হোৱা খবৰে বাৰুকৈয়ে জোকাৰণি তুলিছে প্ৰদেশ কংগ্ৰেছৰ আভ্যন্তৰত । উল্লেখ্য যে,অহা ২৫ ডিচেম্বৰৰ সন্ধিয়া গুৱাহাটীত উপস্থিত হ'ব কেন্দ্ৰীয় গৃহমন্ত্ৰী অমিত শ্বাহ । তেওঁৰ উপস্থিতিতে অজন্তা নেওগে আনুষ্ঠানিকভাৱে বিজেপিত যোগ দিয়াৰ সম্ভাৱনা আছে । ইপিনে,অজন্তা নেওগৰ বিজেপি গমনৰ বাৰ্তাই কংগ্ৰেছ দলক একপ্ৰকাৰ বিমোৰত পেলাইছে ।
সম্প্ৰতি কাৰ্বি আংলং ভ্ৰমণত ব্যস্ত থকা বিৰোধী দলপতি দেৱব্ৰত শইকীয়াই বিভিন্ন ধৰণৰ ভয়-ভাবুকিৰে আন দলৰ মানুহক নিজৰ দললৈ নিয়াটো বিজেপিৰ পুৰণি কৌশল বুলি মন্তব্য কৰিছে । একেদৰে এই প্ৰসংগত তাৎপৰ্যপূৰ্ণ মন্তব্য আগবঢ়াই কংগ্ৰেছ বিধায়ক ৰূপজ্যোতি কুৰ্মীয়ে কয় যে,কংগ্ৰেছৰ বৰ্তমানৰ নেতৃত্বৰ ওপৰত আস্থা আৰু বিশ্বাস নাই বাবেই বহুতে কংগ্ৰেছ এৰি আন দললৈ ঢাপলি মেলিছে ।
বৃহস্পতিবাৰে সন্ধিয়া অজন্তা নেওগে মুখ্যমন্ত্ৰী সৰ্বানন্দ সোণোৱালকো সাক্ষাৎ কৰে । আনহাতে,২০২১ৰ নিৰ্বাচনৰ পূৰ্বে আন ৰাজনৈতিক দলে নিজ নিজ দলৰ সাংগঠনিক ভেঁটি শক্তিশালী কৰাত ব্যস্ত হৈ থকাৰ বিপৰীতে কংগ্ৰেছ দলত দল একাংশ নেতাই দল ত্যাগ কৰাহে দেখা গৈছে ।
