গুৱাহাটী বায়ু সেনা চাউনীৰ কামাণ্ডিং বিষয়া হিচাপে দায়িত্বভাৰ গ্ৰহণ এয়াৰ কম'ড'ৰ ভিটি মাৰেৰ

বিগত 6 মে তাৰিখে কেন্দ্ৰীয় প্ৰতিৰক্ষা বিভাগে গুৱাহাটী বায়ুসেনা চাউনীৰ মুখ্য কামাণ্ডিং বিষয়া হিচাপে দায়িত্বভাৰ অৰ্পণ কৰে এয়াৰ কম'ড'ৰ ভেংকট টি মাৰেক ৷ বুধবাৰে গুৱাহাটী বায়ুসেনা চাউনীত উপস্থিত হৈ আনুষ্ঠানিকভাৱে নিজৰ দায়িত্বভাৰ গ্ৰহণ কৰে জ্যেষ্ঠ তথা অভিজ্ঞ বায়ুসেনা বিষয়াগৰাকীয়ে ৷

গুৱাহাটী, 8 মেঃ গুৱাহাটী বায়ুসেনা চাউনীৰ কামাণ্ডিং বিষয়া হিচাপে আনুষ্ঠানিক দায়িত্বভাৰ গ্ৰহণ কৰিলে বায়ুসেনাৰ জ্যেষ্ঠ তথা অভিজ্ঞ বিষয়া এয়াৰ কম'ড'ৰ ভেংকট টি মাৰে ৷ বৰঝাৰস্থিত বায়ুসেনা চাউনীৰ বিদায়ী কামাণ্ডিং বিষয়া এয়াৰ কম'ড'ৰ শশাংক মিশ্ৰৰ ঠাইত স্থলাভিষিক্ত হয় এয়াৰ কম'ড'ৰ ভেংকট টি মাৰে ৷ দায়িত্বভাৰ গ্ৰহণ কৰাৰ পিচতেই আজি বৰঝাৰস্থিত বায়ুসেনা চাউনীত উপস্থিত হয় বিষয়াগৰাকী ৷ বায়ু সেনাৰ গাৰ্ড অৱ অনাৰ গ্ৰহণ কৰি নিজৰ দায়িত্ব আনুষ্ঠানিকভাৱে গ্ৰহণ কৰে এয়াৰ কম'ড'ৰগৰাকীয়ে ৷

ৰাষ্ট্ৰীয় প্ৰতিৰক্ষা অকাডেমি চমুকৈ এন ডি এ স্নাতক এয়াৰ কম'ড'ৰ ভেংকট টি মাৰে 1990 চনৰ 16 জুনত এগৰাকী হেলিকপ্টাৰ পাইলট হিচাপে বায়ুসেনাত যোগদান কৰিছিল ৷ প্ৰায় 6000 ঘন্টাৰ উৰণ অভিজ্ঞতা থকা বিষয়াগৰাকী উত্তৰ-পূব আৰু জম্মু কাশ্মীৰত হেলিকপ্টাৰ চালনাৰ বিশেষ অভিজ্ঞতাৰে পুষ্ট ৷ বৰঝাৰ বায়ুসেনা চাউনীৰ কামাণ্ডিং বিষয়া হিচাপে যোগদান কৰাৰ পূৰ্বে উত্তৰ-পূবৰ এটি হেলিকপ্টাৰ ইউনিট আৰু আন্দামান নিকোবৰ দীপপুঞ্জস্থিত বায়ুসেনা চাউনীৰ কামাণ্ডিং বিষয়া হিচাপে দায়িত্বৰত আছিল এয়াৰ কম'ড'ৰগৰাকী ৷ ইয়াৰ উপৰিও ৰাষ্ট্ৰসংঘৰ শান্তিৰক্ষা বাহিনীৰ অধীনত কংগো দেশটো সেৱা আগবঢ়াইছে এইগৰাকী অভিজ্ঞ বায়ুসেনা বিষয়াই ৷ ডিফেন্স চাৰ্ভিছেজ ষ্টাফ কলেজ,ৱেলিংটন আৰু আৰ্মী ৱাৰ কলেজ,এমহাওত হায়াৰ কামাণ্ড কৰ্ছৰ স্নাতক বিষয়াগৰাকী বুধবাৰে গুৱাহাটীত উপস্থিত হৈ নিজৰ দায়িত্বভাৰ গ্ৰহণ কৰে৷