মাইক্ৰ'ফাইনেঞ্চ প্ৰতিষ্ঠানৰ বিৰুদ্ধে যোৰহাটত তীব্ৰ প্ৰতিবাদ

যোৰহাটৰ মহিলা কল্যাণ উন্নতি অসমৰ উদ্যোগত মঙলবাৰে শতাধিক মহিলাই মাইক্ৰ’ফাইনেঞ্চ প্ৰতিষ্ঠানসমূহৰ বিৰুদ্ধে প্ৰতিবাদ সাব্যস্ত কৰে ৷ যোৰহাটৰ বিস্তুৰাম বৰুৱা হ'লৰ পৰা মহিলাসকলে এক প্ৰতিবাদী সমদল উলিয়াই জিলা উপায়ুক্তৰ কাৰ্যালয়ৰ সন্মুখত উপস্থিত হৈ সাব্যস্ত কৰে প্ৰতিবাদ ৷

যোৰহাট, 4 ফেব্ৰুৱাৰীঃ সময়ে সময়ে গাঁৱৰ মহিলাসকলৰ পৰা প্ৰৱঞ্চনাৰে ধন সৰকোৱাৰ লগতে ধন পৰিশোধৰ বাবে হেঁচা প্ৰয়োগৰ বাবে মাইক্ৰ’ফাইনেঞ্চ প্ৰতিষ্ঠানৰ বিৰুদ্ধে সৰৱ হৈ পৰিছে ৰাজ্যৰ মহিলাসকল ৷ মাইক্ৰ'ফাইনেঞ্চৰ এজেন্টে গাঁৱৰ মহিলাসকলক প্ৰবঞ্চনা কৰাৰ অভিযোগ উত্থাপন কৰি মঙলবাৰে যোৰহাটত মাইক্ৰ'ফাইনেঞ্চ প্ৰতিষ্ঠান সমূহৰ বিৰুদ্ধে সৰৱ হৈ পৰে শতাধিক মহিলা ৷ মহিলা কল্যাণ উন্নতি অসমৰ উদ্যোগত গাঁৱৰ সহজ সৰল মহিলাসকলক ঋণৰ নামত প্ৰবঞ্চনা কৰাৰ লগতে ঋণ পৰিশোধৰ নামত হাৰাশাস্তি কৰাৰ অভিযোগ উত্থাপন কৰি ধৰ্ণা কাৰ্য্যসূচী ৰূপায়ণ কৰে মহিলাসকলে ৷ উল্লেখ্য যে, মাইক্ৰ’ফাইনেঞ্চ এজেন্টে গাঁৱৰ সহজ সৰল মহিলাসকলক ৩০ হাজাৰ টকাৰ ঋণ লৈ হিতাধিকাৰীসকলক প্ৰদান কৰিছে 3 হাজাৰ টকা ৷ যাৰ ফলত মহিলাসকলে ঋণৰ নামত পৰিশোধ কৰিবলগীয়া হৈছে অত্যধিক 45 হাজাৰ টকা ৷

মঙলবাৰে যোৰহাটৰ বিস্তুৰাম বৰুৱা হ'লৰ পৰা মহিলাসকলে এক প্ৰতিবাদী সমদল উলিয়াই জিলা উপায়ুক্তৰ কাৰ্যালয়ৰ সন্মুখত উপস্থিত হৈ তীব্ৰ প্ৰতিবাদ সাব্যস্ত কৰে ৷ যদিহে জিলা প্ৰশাসনে মাইক্ৰ'ফাইনেঞ্চ প্ৰতিষ্ঠান সমূহ বন্ধ কৰি নিদিয়ে তেনেহ’লে পৰৱৰ্তী সময়ত প্ৰতিষ্ঠান সমূহৰ কাৰ্য্যালয়ৰ ভাঙি পেলোৱাৰো হুংকাৰ দিয়ে প্ৰতিবাদকাৰীসকলে ৷ আনহাতে, এই মাইক্ৰ’ফাইনেঞ্চ প্ৰতিষ্ঠানসমূহৰ বিৰুদ্ধে থকা অভিযোগ সম্বলিত এক স্মাৰক পত্ৰও জিলা উপায়ুক্তৰ যোগেদি অসমৰ মুখ্যমন্ত্ৰীলৈ প্ৰেৰণ কৰে প্ৰতিবাদকাৰীসকলে ৷

লগতে পঢ়ক-অভিভাৱক বিহীন হ'ল শিৱসাগৰবাসী