যোৰহাট, 11 ডিচেম্বৰ : আধুনিক শৈল চিকিৎসাত আন চিকিৎসা পদ্ধতি সংপৃক্তকৰণৰ বাবে কেন্দ্ৰীয় চৰকাৰে দিয়া নিৰ্দেশৰ বিৰুদ্ধে ক্ষোভ উজাৰিলে যোৰহাট চিকিৎসা মহাবিদ্যালয়ৰ শিক্ষক, কণিষ্ঠ চিকিৎসক সকলে ৷ প্ৰতিবাদকাৰী সকলৰ মতে সকলো ধৰণৰ চিকিৎসাৰে আছে নিজা নিজা বৈশিষ্ট্য ৷ যাৰ বাবে শৈল চিকিৎসাৰ সৈতে আন চিকিৎসা পদ্ধতিক সংপৃক্ত কৰিবলৈ চৰকাৰে লোৱা সিদ্ধান্তক তীব্ৰ বিৰোধিতা কৰে প্ৰতিবাদকাৰী সকলে ৷
কেৱল যোৰহাটতে নহয় ৷ চৰকাৰৰ এনে সিদ্ধান্তৰ বিৰুদ্ধে শুকুৰবাৰে বিৰোধ প্ৰদৰ্শন কৰিলে সমগ্ৰ দেশৰে শৈল চিকিৎসকলে ৷ তেওঁলোকৰ হুংকাৰ, যিহেতু তেওঁলোকে আনৰ চিকিৎসা পদ্ধতিত কোনো ধৰণৰ হস্তক্ষেপ কৰা নাই সেয়ে, তেওঁলোকৰ চিকিৎসা পদ্ধতিতো তেওঁলোকে নিবিচাৰে আনৰ হস্তক্ষেপ ৷ শুকুৰবাৰে অৱস্থান ধৰ্মঘট কৰাৰ লগতে চিকিৎসা সেৱা প্ৰদানৰ পৰাও বিৰত থাকে চিকিৎসা মহাবিদ্যালয় খনৰ শিক্ষক, কণিষ্ঠ চিকিৎসকসকল ৷ অৱশ্যে ক'ভিড বা আন জৰুৰীকালীন চিকিৎসা অব্যাহত ৰাখে তেওঁলোকে ৷
লগতে পঢ়ক: শিৱসাগৰত চিকিৎসকৰ অৱস্থান ধৰ্মঘট
