টীয়ক, 30 ডিচেম্বৰঃ নাগৰিকত্ব সংশোধনী আইন বিৰোধিতাৰে তিনিচুকীয়াৰ পৰা দিছপুৰলৈ পদযাত্ৰা এদল প্ৰতিবাদকাৰীৰ ৷ আইনখন বাতিলৰ দাবীত তিনিচুকীয়াৰ ডিৰাক সীমান্তৱৰ্তী অঞ্চলৰ পৰা বিগত ২০ তাৰিখৰ পৰা ৩০ জনীয়া এক প্ৰতিবাদী দলে দিছপুৰলৈ পদযাত্ৰা আৰম্ভ কৰে ৷
সোমবাৰে এই পদযাত্ৰাকাৰী দলটো উপস্থিত হয় টীয়কত । "পদব্ৰজে দিছপুৰ যাঁও ব'লক" শীৰ্ষক বেনাৰ হাতত লৈ নাগৰিকত্ব সংশোধনী আইন বাতিলৰ দাবী পদযাত্ৰা আৰম্ভ কৰে ৷ লগতে আগন্তুক ২০ জানুৱাৰীত দিছপুৰত মুখ্যমন্ত্ৰীক লগ ধৰি স্মাৰকপত্ৰ প্ৰদান কৰাৰ লগতে ৰাজ্যৰ সামগ্ৰিক পৰিস্থিতি সন্দৰ্ভত মুখামুখিকৈ প্ৰশ্ন উত্থাপন কৰাৰ উদ্দেশ্যেৰে এই কাৰ্যসূচী গ্ৰহণ কৰা হৈছে বুলি মন্তব্য কৰে প্ৰতিবাদকাৰীসকলে ৷
উল্লেখ্য যে, প্ৰতিবাদকাৰী দলটোক ঠায়ে ঠায়ে বিভিন্ন দল সংগঠনে সহযোগিতা কৰে বুলিও মন্তব্য কৰে দলটোৱে ৷ সোমবাৰে টীয়কত দলটো উপস্থিত হোৱা পাচতে লাচিত সেনাৰ কেইবাজনো কেন্দ্ৰীয় বিষয়ববীয়াই পদযাত্ৰা কৰি দলটোক সহযোগিতা আগবঢ়োৱা বুলিও প্ৰকাশ কৰে দলটোৱে ।
