টীয়ক , 30 মে': যোৰহাট জিলাৰ টীয়কৰ জাঁজীমুখৰ ৰাজ্যিক চিকিৎসালয়ত অৰাজকতা । চিকিৎসালয়খনত নিদিষ্ট সময়ত চিকিৎসকে ধৰি আন আন বিষয়া কৰ্মচাৰী সকল উপস্থিত নথকাৰ অভিযোগ ৷
যাৰ ফলত দূৰ দূৰণিৰ পৰা বাটকুৰি বাই অহা ৰোগী সকলে দূৰ্ভোগ ভুগিব লগীয়া হয় ৷ এই চিকিৎসালয়খন বৃহত্তৰ জাঁজীমুখ অঞ্চলৰ ৰোগীসকলৰ একমাত্ৰ ভৰসা ৷ অসমৰ স্বাস্থ্যমন্ত্ৰী গৰাকীয়ে অসমৰ বিভিন্ন অঞ্চলত চিকিৎসালয় তথা চিকিৎসা মহাবিদ্যালয় স্থাপন কৰি বাহঃ বাহঃ লোৱাৰ সময়তে জাঁজীমুখৰ দৰে এনেকুৱা অঞ্চলত থকা চিকিৎসালয় বোৰে ৰাজ্যৰ স্বাস্থ্য বিভাগৰ ফোপোলা স্বৰূপ উদঙাই ধৰিছে ৷ বিগত সময়তো এই চিকিৎসালয়খনত এনেকুৱা ঘটনা সংঘটিত হোৱাৰ বাতৰি বহুবাৰ সংবাদমাধ্যম আৰু চ'ছিয়েল মিডিয়াত প্ৰচাৰ হৈছিল ৷ ইপিনে এই সন্দৰ্ভত স্থানীয় সচেতন ৰাইজে বাৰম্বাৰ অভিযোগ দিয়াৰ পাচতো, কাৰ ছত্ৰছায়াত আচলতে এনেকৈ অৰাজকতাৰ মাজত চিকিৎসালয়খন চলি আছে তাক লৈ এতিয়া সচেতন মহলত প্ৰশ্ন উত্থাপন হৈছে৷
