হোজাই, 25 ছেপ্টেম্বৰ : "মহিলাৰ প্ৰতি বিজেপিৰ আন্তৰিকতা নাই ৷ মহিলাসকলৰ বাবে আসন সংৰক্ষণ কৰা এইবোৰ বিজেপিৰ ভেকোভাওনা ৷" এই মন্তব্য বিধায়ক তথা কংগ্ৰেছ নেতা ৰকিবুল হুছেইনৰ ৷ সোমবাৰে হোজাইত উপস্থিত হৈ বিজেপিৰ প্ৰতি এইদৰে মন্তব্য কৰে কংগ্ৰেছ নেতাজনে ৷
হোজাই বিধানসভা সমষ্টিৰ আগন্তুক অভিৱৰ্তন সন্দৰ্ভত সোমবাৰে অনুষ্ঠিত হোৱা প্ৰস্তুতি সভাত অংশগ্রহণ কৰে কংগ্ৰেছ বিধায়ক ৰকিবুল হুছেইনে ৷ এই সভাৰ অন্তত কেইবাজনো AIUDF ৰ সদস্যই কংগ্ৰেছত যোগদান কৰে ৷ কংগ্ৰেছ নেতা ৰাহুল গান্ধীয়ে কংগ্ৰেছ আৰু AIUDF ৰ মিত্ৰতা সন্দৰ্ভত কৰা মন্তব্যৰো প্ৰতিক্ৰিয়া প্ৰকাশ কৰে ৰকিবুল হুছেইনে ৷
তেওঁ কয় যে, AIUDF ৰ লগত আমাৰ মিত্ৰতা নহ’লে আমাৰ লাভ হব ৷ যোৱাবাৰ AIUDF ৰ লগত কংগ্ৰেছৰ মিত্ৰতা হোৱাৰ বাবেহে কংগ্ৰেছৰ চৰকাৰ নহ’ল ৷ হিমন্ত বিশ্ব শৰ্মাই ৰাষ্ট্ৰীয় টিভি চেনেলত ভঙা ভঙা হিন্দীৰে কৈছে বদৰুদ্দিন মোৰ নিজৰ মানুহ বুলি ৷ আজমলে মই মুখ্যমন্ত্ৰী হৈ থকাটো বিচাৰে ৷ বদু ভাইক ৰাজ্যসভাৰ চীট যাকে দিব কওঁ তাকে দিয়ে ৷ মুখ্যমন্ত্ৰী হিমন্ত বিশ্ব শৰ্মাই আজমল সন্দৰ্ভত এইদৰে কয় বুলি উল্লেখ কৰি ৰকিবুল হুছেইনে কয় যে, বদু ভাই আৰু হিমু ভাইয়ে মিলি বিজেপি কৰিছে, ফলত আচল বিজেপিৰ লোকসকল ক্ষোভিত হৈছে ৷
এক দেশ, এক নিৰ্বাচন সন্দৰ্ভতো মন্তব্য প্ৰকাশ কৰে ৰকিবুল হুছেইনে ৷ বিজেপিয়ে যিদিনাই এক দেশ, এক নিৰ্বাচনৰ কথা কৈছে, সেইদিনাৰ পৰাই মুখ্যমন্ত্রীৰ মুখখন বেজাৰ বেজাৰ যেন লগা হৈছে ৷ সোমবাৰেও মুখখন ডাৱৰ ডাৱৰ যেন লগা হৈছে ৷ কাৰণ এনে হলে হিমন্ত বিশ্ব শৰ্মাই পদত্যাগ কৰিব লাগিব বুলি কয় তেওঁ ৷
ইফালে সমষ্টি পুনৰ নিৰ্ধাৰণ সন্দৰ্ভত মুখ্যমন্ত্রী হিমন্ত বিশ্ব শৰ্মাক এক্সপার্ট আখ্যা দিয়ে ৰকিবুল হুছেইনে ৷ আনহাতে বাগানে বাগানে কংগ্ৰেছ শীৰ্ষক কাৰ্যসূচীক লৈও প্ৰতিক্ৰিয়া ব্যক্ত কৰে কংগ্ৰেছ বিধায়কগৰাকীয়ে ৷ তেওঁ কয় যে, বাগানৰ ৰাইজে বিজেপিক সমালোচনা কৰাৰ লগতে কংগ্ৰেছৰ প্ৰতি অভূতপূৰ্ব সঁহাৰি জনাইছে ৷ কংগ্ৰেছৰ বিধায়ক নথকা সমষ্টিত কংগ্ৰেছে বৃহৎ সভা অনুষ্ঠিত কৰিব বুলিও কয় তেওঁ ৷
লগতে পঢ়ক : Yogendra Yadav : কুকি উগ্ৰপন্থীৰ সৈতে মুখ্যমন্ত্ৰী হিমন্ত বিশ্বৰ গোপন বুজাবুজিৰ অভিযোগ যোগেন্দ্ৰ যাদৱৰ
