এখন আজৱ বিদ্যালয় : ছাত্ৰ-ছাত্ৰীয়ে চিনি নাপাই শিক্ষকক

হাইলাকান্দিৰ 29 নং গুমৰুকেৰপাৰ নিম্ন প্ৰাথমিক বিদ্যালয়ৰ প্ৰধান শিক্ষক ধুমকেতুৰ দৰে ৷ উপস্থিত নাথাকে বিদ্যালয়ত ৷ প্ৰধান শিক্ষকৰ অনিয়মানুৱৰ্তীতাত এতিয়া ক্ষুণ্ণ অভিভাৱক সকল ৷

হাইলাকান্দি, 26 ছেপ্টেম্বৰ : হাইলাকান্দিৰ এখন আজৱ বিদ্যালয় ৷ নিজৰেই শিক্ষকক চিনি নাপাই বিদ্যালয় খনৰ ছাত্ৰ-ছাত্ৰীয়ে ৷ কিয়নো বিদ্যালয়লৈ ছাত্ৰ ছাত্ৰী ঠিকেই আহে, কিন্তু নাহে শিক্ষক ৷ হাইলাকান্দিৰ 29 নং গুমৰুকেৰপাৰ নিম্ন প্ৰাথমিক বিদ্যালয়ত হৈছে এই আজৱ কাণ্ড ৷ বিদ্যালয় খনৰ প্ৰধান শিক্ষক ইব্ৰাহিম আলীয়ে ধুমকেতুৰ দৰে কেতিয়াবাহে দেখা দিয়ে বিদ্যালয়ত ৷ যাৰ বাবে ছাত্ৰ-ছাত্ৰীৰ একাংশই প্ৰধান শিক্ষকৰ নাম নজনাৰ বিপৰীতে আন একাংশৰ ছাৰকেই দেখা পোৱাৰ সৌভাগ্য হোৱা নাই ৷

প্ৰধান শিক্ষক ইব্ৰাহিম আলীৰ অনিয়মানুৱৰ্তীতাত এতিয়া ক্ষুণ্ণ হৈ পৰিছে অভিভাৱক সকল ৷ ছাত্ৰ-ছাত্ৰীৰ শিক্ষা জীৱনক লৈ হেতালি খেলা এইজন প্ৰধান শিক্ষকৰ বিৰুদ্ধে শিক্ষা বিভাগ তথা প্ৰশাসনে অতি শীঘ্ৰে ব্যৱস্থা গ্ৰহণ কৰিবলৈ দাবী উত্থাপিত হৈছে ৷ ইয়াৰোপৰি বিদ্যালয় খনৰ ছাত্ৰ-ছাত্ৰীক মধ্যাহ্ন ভোজনো প্ৰদান নকৰে বুলি অভিভাৱক সকলে অভিযোগ কৰিছে ৷

লগতে চাওক, বিকশিত অসমৰ উন্নয়নৰ নগ্ন স্বৰূপ !