সৰুপথাৰ,20 ফেব্ৰুৱাৰীঃ মানৱীয়তাৰ উৎকৃষ্ট নিদৰ্শন দেখুৱালে ধনশিৰি মহকুমাৰ অন্তৰ্গত বাৰঘৰীয়াৰ ৰাইজে ৷ উল্লেখ্য যে, বিগত 7 ফেব্ৰুৱাৰীত ৰন্ধন গেছৰ চিলিণ্ডাৰ বিস্ফোৰণৰ ফলত গাঁৱখনৰ জয়ন্তী বৰা আৰু পুত্ৰ বকুল বৰাৰ বাসগৃহটো সম্পূৰ্ণৰূপে জুইত জাহ গৈছিল ৷ স্থানীয় ৰাইজে অগ্নিনিৰ্বাপক বাহিনীৰ তৎপৰতাত জুই নুমুৱাবলৈ সক্ষম হয় যদিও ঘৰৰ আচবাবসমূহ সম্পূৰ্ণৰূপে জুইত জাহ যায় ৷
ঘটনা সন্দৰ্ভত আজিলৈকে কোনো সহায়ৰ হাত আগবঢ়োৱা নাই স্থানীয় বিধায়িকা ৰ'জলীনা তিৰ্কীয়েয়ো ৷ দুৰ্ভগীয়া পৰিয়ালটোক বিগত সময়ছোৱাত সহায়ৰ হাত আগবঢ়োৱা বাৰঘৰীয়াৰ ৰাইজে বাসপোযোগী এটি গৃহ নিৰ্মাণ কৰি দিয়ে ৷ ইফালে, ধনশিৰি মহকুমাৰ চুতীয়া ছাত্ৰ সন্থাৰ এটা দলে জয়ন্তী বৰাৰ বাসগৃহত উপস্থিত হৈ টিনপাত আগবঢ়াই পৰিয়ালটোক কিছু সকাহ দিয়ে ৷ লগতে স্থানীয় প্ৰতিনিধিৰ ভূমিকাত তীব্ৰ অসন্তুষ্টি প্ৰকাশ কৰে চুতীয়া ছাত্ৰ সন্থাৰ নেতা-কৰ্মীসকলে ৷
