ধন দাবী কৰি চাকৰি হেৰুওৱাৰ পথত আৰক্ষী বিষয়া !!

এটা সাধাৰণ ছাগলী চুৰিকাণ্ডক লৈ ভাৰপ্ৰাপ্ত বিষয়া পদ্মেশ্বৰ সাউদে এগৰাকী মহিলাৰ পৰা ১০ হেজাৰ টকা উৎকোচ বিচাৰি অশ্লীল গালি গালাজ কৰে । পদ্মেশ্বৰ সাউদে টপচি ওৰফে হানিফ নামৰ ছাগলী ব্যৱসায়ীজনক গোচৰৰ পৰা ৰেহাই দিয়াৰ নামত দাবী কৰিছিল দহ হাজাৰ টকা ৷

গোলাঘাট, 4 নৱেম্বৰঃ গোলাঘাটত আৰক্ষীয়ে মহিলাক অভব্য আচৰণ কৰাৰ লগতে ধন দাবী কৰা ভিডিঅ' চ'ছিয়েল মিডিয়াত ভাইৰেল হোৱাৰ পিছত আৰক্ষী মহলত ব্যাপক প্ৰতিক্ৰিয়াৰ সৃষ্টি হৈছে । আৰক্ষী থানাৰ ভিতৰত ডকাইতৰ দৰে ধন সংগ্ৰহ কৰা ঘিলাধাৰী আৰক্ষী থানাৰ ভাৰপ্ৰাপ্ত আৰক্ষী বিষয়া পদ্মেশ্বৰ সাউদক গ্ৰেপ্তাৰৰ দাবী উত্থাপন হৈছে । এই ঘটনা পোহৰলৈ অহাৰ পিছত ঘটনা সন্দৰ্ভত অতিৰিক্ত আৰক্ষী অধীক্ষক সুৰজিৎ সিং পানেছৰে আৰম্ভ কৰিছে তদন্ত ।

উল্লেখ্য যে, এটা সাধাৰণ ছাগলী চুৰিকাণ্ডক লৈ ভাৰপ্ৰাপ্ত বিষয়া পদ্মেশ্বৰ সাউদে এগৰাকী মহিলাৰ পৰা ১০ হেজাৰ টকা উৎকোচ বিচাৰি অশ্লীল গালি গালাজ কৰাৰ অভিযোগ উত্থাপন হৈছে । পদ্মেশ্বৰ সাউদে টপচি ওৰফে হানিফ নামৰ ছাগলী ব্যৱসায়ীজনক গোচৰৰ পৰা ৰেহাই দিয়াৰ নামত দাবী কৰিছিল দহ হাজাৰ টকা । দহ হাজাৰৰ এটকাও কম নহ'ব বুলি ভয় ভাবুকি প্ৰদান কৰি এগৰাকী মহিলাক অশ্লীল শব্দেৰে অভব্য আচৰণ কৰি কোঠাৰ পৰা বাহিৰ কৰি দিছিল । যাৰ ফলত মহিলাগৰাকীয়ে সাচতীয়া ধন ভাঙি ১০ হাজাৰ টকা আদায় দিছিল পদ্মেশ্বৰ সাউদক ।

আনহাতে, ঘটনা সন্দৰ্ভত ভাৰপ্ৰাপ্ত বিষয়া পদ্মেশ্বৰ সাউদে ধন দাবী কৰা বিষয়টো অস্বীকাৰ কৰি ছাগলীৰ মূল্যহে বিচাৰিছিল বুলি মন্তব্য কৰে । ঘটনাৰ সন্দৰ্ভত অতিৰিক্ত আৰক্ষী অধীক্ষক সুৰজিৎ সিং পানেছৰে তদন্ত অব্যাহত ৰাখিছে । গোলাঘাট আৰক্ষীয়ে এইজন দুৰ্নীতিগ্ৰস্থ আৰক্ষী বিষয়াৰ বিৰুদ্ধে কি ব্যৱস্থা গ্ৰহণ কৰে সেয়া লক্ষণীয় হ'ব।