বিয়াখন মাৰোৱাৰী সম্প্ৰদায়ৰ; কিন্তু পিন্ধনত সম্পূৰ্ণ পৰম্পৰাগত অসমীয়া সাজ-পাৰ

সম্পূৰ্ণ অসমীয়া সাজ পোছাকত মাৰোৱাৰী সম্প্ৰদায়ৰ কইনা । কেৱল কইনাই নহয় ৷ কইনাৰ পৰিয়ালৰ সকলো মানুহ, কণমানি কিশোৰীৰ পৰা আৰম্ভ কৰি শুভাকাংক্ষীলৈকে সকলোৱে পৰিধান কৰিছে অসমীয়া চাদৰ-মেখেলা ৷

গোলাঘাট,7 ডিচেম্বৰঃ শুকুৰবাৰে গোলাঘাটৰ মহেশ্বৰী বিবাহ ভৱনত সম্পন্ন হৈছে এইখন মাৰোৱাৰী সম্প্ৰদায়ৰ বিবাহ । কইনা গোলাঘাটৰ বিন্দীয়া মহেশ্বৰী আৰু দৰা যোৰহাটৰ সুৰেন্দ্ৰ মালানী । এওঁলোকৰ মাজত সম্পন্ন হোৱা এই বিবাহখন বিশেষ আকৰ্ষণৰ কেন্দ্ৰ হৈ পৰিল । গোলাঘাটৰ এই বিয়াখনে বহুতৰে দৃষ্টি আকৰ্ষণ কৰিবলৈ সক্ষম হয় । কাৰণ সম্পূৰ্ণ অসমীয়া সাজ পোছাক পৰিধান কৰিছে মাৰোৱাৰী সম্প্ৰদায়ৰ কইনাগৰাকীয়ে, কেৱল কইনাই নহয় কইনাৰ পৰিয়ালৰ সকলো মানুহ, কণমানি কিশোৰীৰ পৰা আৰম্ভ কৰি শুভাকাংক্ষীলৈকে সকলোৱে পৰিধান কৰিছে অসমীয়া চাদৰ-মেখেলা৷

অসমীয়া সমাজৰ পৰম্পৰা ,সংস্কৃতিক সু-হৃদয়তাৰে আঁকোৱালি লৈছে এই সকল লোকে ৷ যি সময়ত অসমীয়া ভাষা সংস্কৃতিক লৈ একাংশই উদ্ভট মন্তব্য আগবঢ়াই ভাতৃ ঘাটি সংঘৰ্ষ লগোৱাৰ চেষ্টা অব্যাহত ৰাখিছে তেনে সময়তে গোলাঘাটৰ এই সকল মাৰোৱাৰী মহিলাই সমন্বয় আৰু সম্প্ৰীতিৰ এক সুন্দৰ উদাহৰণ দাঙি ধৰিছে । নিজকে অসমীয়া হিচাপে পৰিচয় দিবলৈ গৌৰৱ অনুভৱ কৰা এইসকল লোকে দেখুৱাইছে অসমীয়া সংস্কৃতিৰ এক সুন্দৰ নিদৰ্শন ৷