গোলাঘাট নুমলীগড়ত ভয়াবহ পথ দুৰ্ঘটনা, আহত এজন

গোলাঘাট নুমলীগড়ত ভয়াৱহ পথ দুৰ্ঘটনা । টেংকাৰৰ তলত সোমাল পালচাৰ বাহনসহ আৰোহী । সংকটজনক অৱস্থাত চিকিৎসালয়ত ভৰ্তি

গোলাঘাট, 19 মে': শনিবাৰে নিশা নুমলীগড় তিনিআলিত সংঘটিত হয় এক ভয়ংকৰ পথ দুৰ্ঘটনা ৷ দুৰ্ঘটনাত টেংকাৰৰ তলত সোমাই যায় AS-05-K-0771 নম্বৰৰ পালচাৰ বাইকসহ আৰোহী । মৰঙি অভিমুখে আহি থাকোতে পথৰ দুৰৱস্থাৰ বাবেই নিয়ন্ত্ৰণ হেৰুৱাই বিপৰীত দিশৰ পৰা আহি থকা AS 01 Y 8151 নম্বৰৰ টেংকাৰৰ তলত সোমাই পৰে বাইকখন । দুৰ্ঘটনাৰ ফলত গুৰুতৰ ভাৱে আহত বোকাখাট ৰজাবাৰীৰ গৌৰাংগ বৰ্মন নামৰ বাইক আৰোহীজন৷

যুৱক জনক স্থানীয় ৰাইজে নুমলীগড়ৰ বিবেকানন্দ চিকিৎসালয়লৈ নিয়ে যদিও উন্নত চিকিৎসাৰ বাবে যোৰহাটলৈ প্ৰেৰণ কৰা হয় ৷ বৰ্তমান যোৰহাট চিকিৎসা মহাবিদ্যালয়ত মৃত্যুৰ সৈতে যুঁজি আছে যুৱকজনে । স্থানীয় ৰাইজৰ দাবী ঘাইপথৰ দুৰাৱস্থাৰ বাবেই এনেদৰে সঘনাই সংঘটিত হৈ আহিছে ভয়াবহ পথ দুৰ্ঘটনা ।