গোৱালপাৰা, 19 জুনঃ কামৰ সন্ধানত গোৱালপাৰা জিলাৰ সদৰ থানাৰ অন্তৰ্গত কুৰুৱাভাষাৰ পৰা বাংগালোৰলৈ গৈছিল চাৰিজনীয়া এটা যুৱকৰ দল৷ বাংগালোৰ এক্সপ্ৰেছেৰে গৈ থকা অৱস্থাতে ৰে'লষ্টেচনৰ পৰা নিৰুদ্দেশ হয় ৰোহিত সূত্ৰধৰ (৩৮) নামৰ যুৱকজন ৷ উল্লেখ্য যে, যোৱা ১৫ জুনত একে গাঁৱৰে মেলাৰাম সূত্ৰধৰৰ পুত্ৰ ৰোহিত সূত্ৰধৰ(৩৮), কালেন্দ্ৰ সূত্ৰধৰ, বনজিৎ সূত্ৰধৰ আৰু সুৰজিৎ সূত্ৰধৰে কৰ্মসূত্ৰে গোৱালপাৰাৰ পৰা বাংগালোৰলৈ গৈছিল । কিন্তু যোৱা ১৬ জুনৰ নিশা এক বজাত ৰোহিতৰ পৰিয়াললৈ ফোন আহে যে অন্ধ্ৰপ্ৰদেশৰ বিজয়ৱাৰা ষ্টেচনত নিশা ১২ বজাত নমাৰ পিচত পুনৰ দবাটোলৈ ঘূৰি নাহে ৰোহিত ।
বহু বিচাৰ খোচাৰ কৰিও লগৰ কেইজনে ৰোহিতৰ সন্ধান নাপাই পৰিয়ালৰ লোকক ফোন কৰি ঘটনা সন্দৰ্ভত জানিবলৈ দিয়ে ৷ উক্ত খবৰ পাই ৰোহিতৰ পৰিয়ালত এক হুৱাদুৱা পৰিস্থিতিৰ সৃষ্টি হয় আৰু যুৱকজনক বিচাৰি পৰিয়ালৰ লোক ঘটনাস্থলীলৈ ৰাওনা হয় । কোনো লোকে যুৱকজনৰ সন্ধান পালে ৭০৮৬১৬২৪৮১ নম্বৰত যোগাযোগ কৰিবলৈ আহ্বান জনাইছে পৰিয়ালৰ লোকে ৷
