ডিমা হাছাও, ১৯ ফেব্ৰুৱাৰী: বৃহস্পতিবাৰে ডিমা হাছাও জিলাৰ হাফলঙৰ চনটিলাত চৰকাৰী আবাস নিৰ্মাণত নিয়োজিত এগৰাকী শ্ৰমিকৰ তিনি মহলাৰ পৰা পৰি মৃত্যু হয় । হাফলং চহৰৰ পৰা ২০ কিলোমিটাৰ নিলগত চনটিলাত পশু পালন বিভাগৰ আবাস নিৰ্মাণৰ কাম চলি আছিল । এই কামত নিহত শ্ৰমিকগৰাকী নিয়োজিত আছিল । কাম কৰি থকা অৱস্থাত হঠাতে লোহাৰ ৰড এডালেৰে আঘাতপ্ৰাপ্ত হোৱাত লগে লগে তিনি মহলাৰ পৰা পৰি গুৰুত্বৰভাৱে আঘাতপ্ৰাপ্ত হয় শ্ৰমিকজন ।
ঘটনাতো সংঘটিত হোৱাৰ লগে লগে তেওঁৰ আন শ্ৰমিক সতীৰ্থসকলে আঘাতপ্ৰাপ্ত শ্ৰমিকজনক উদ্ধাৰ কৰি হাফলং অসামৰিক চিকিৎসালয়লৈ লৈ যায় । কিন্তু তাৰ পাচতে চিকিৎসকে শ্ৰমিকজনক মৃত বুলি ঘোষণা কৰে । নিহত শ্ৰমিকজন কৰিমগঞ্জ জিলাৰ বদৰপুৰ মহাকালৰ বাসিন্দা গৌতম শুক্লবৈদ্য বুলি জানিব পৰা গৈছে । ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে ।
লগতে পঢ়ক:নিৰ্বাচনক লৈ তিনি বিপিএফ নেতাৰ গোপন বৈঠক
