ডিব্ৰুগড়,৯ জুন: জু-ৰোড বিস্ফোৰণৰ লগত সাঙোৰ খাই পৰিছে এজন শিক্ষকৰ নাম । দেওবাৰে জু-ৰোড বিস্ফোৰণৰ ঘটনাৰ লগত জড়িত থকাৰ সন্দেহত ডিব্ৰুগড় আৰক্ষীয়ে গ্ৰেপ্তাৰ কৰে প্ৰকাশ ৰাজকোঁৱৰ ওৰফে চাও নাম টি লাওক । তিনিচুকীয়া জিলাৰ ডিৰাকগেটৰ নৱজ্যোতিৰ বাসিন্দা প্ৰকাশ ৰাজকোঁৱৰ ডিৰাক প্ৰাথমিক বিদ্যালয়ৰ প্ৰাক্তন শিক্ষক আছিল । এই 65 বছৰীয়া ৰাজকোঁৱৰক দেওবাৰে ডিব্ৰুগড় আৰক্ষীয়ে গ্ৰেপ্তাৰ কৰে ডিব্ৰুগড়ৰ মিলননগৰৰ পৰা । ৰাজকোঁৱৰে মিলন নগৰৰ সুন্দৰ ৰাজকোঁৱৰ নামৰ এজন ব্যক্তিৰ ঘৰত ভাড়াতীয়া হিচাপে আছিল দুবছৰ পূৰ্বৰ পৰা । গ্ৰেপ্তাৰ কৰা সময়ত আৰক্ষীয়ে লোকজনৰ পৰা জব্দ কৰে এটা কম্পিউটাৰ চি পি ইউ,4টা মোবাইল আৰু বহু আপত্তি জনক সামগ্ৰী । প্ৰাক্তন শিক্ষকজনে ডিব্ৰুগড়ৰ ভাড়াঘৰত থাকি জু-ৰোড বিস্ফোৰণত জড়িতসকলৰ সৈতে সম্পৰ্ক ৰখাৰ লগতে বাসগৃহতো আছিল বুলি সন্দেহ প্ৰকাশ কৰা হৈছে । ইফালে,প্ৰকাশ ৰাজকোঁৱৰক ডিব্ৰুগড় আৰক্ষীয়ে আটক কৰা পাছত গুৱাহাটী আৰক্ষীৰ এটা দলৰ সহযোগত অনা হয় গুৱাহাটীলৈ ।
উল্লেখযোগ্য যে,১৫ মে'ত জু-ৰোডত সংঘটিত হোৱা বোমা বিস্ফোৰণ ঘটনাৰ লগত জড়িত থকাৰ অভিযোগত ইতিমধ্যেই জাহ্নৱী শইকীয়া, প্ৰাণময় ৰাজগুৰু,সঞ্জীৱ তালুকদাৰ,বিজয় অসম,পাপু কোচ,অমিত বল্লভ গোস্বামীক গ্ৰেপ্তাৰ কৰা হৈছে । অৱশ্যে প্ৰাক্তন শিক্ষকগৰাকী বোমা বিস্ফোৰণ ঘটনাৰ লগত কেনেদৰে আছিল সেয়া জানিব পৰা হোৱা নাই ।
