টিংখাং,25 মে’: মৎস্য পালনেৰে স্বাৱলম্বিতাৰ উৎকৃষ্ট নিদৰ্শন দেখুৱাইছে টিংখাঙৰ এজন যুৱকে ৷ 15 বিঘা কৃষি ভূমিত পুখুৰী খান্দি মীন পালন কৰিছে শিশুমৰা গাঁৱৰ উমানন্দ চুতীয়া নামৰ যুৱকজনে ৷ একাগ্ৰতা আৰু কৰ্মদক্ষতাৰ পৰিচয় দাঙি ধৰি আন বহুতৰ বাবে প্ৰেৰণা আৰু আদৰ্শৰ নিদৰ্শন দাঙি ধৰিছে উমানন্দই । মাত্ৰ তিনিবছৰ পূৰ্বে কম মূলধন আৰু কম ভূমিত মৎস্য পালনৰ কাম আৰম্ভ কৰিছিল যুৱকজনে ।
অতি কম সময়ৰ ভিতৰতে লাভৰ মুখ দেখিবলৈ পোৱা উমানন্দ চুতীয়াই তিনিবছৰৰ ভিতৰতে মৎস্য পালনৰ পৰিসৰ বৃদ্ধি কৰি বৰ্তমান যথেষ্ট টকা উপাৰ্জন কৰিবলৈ সক্ষম হৈছে । তেওঁ বৰ্তমান মৎস্য পালন কৰাৰ লগতে মাছৰ পোনাও বিক্ৰী কৰি মৎস্যপালকৰ চাহিদা পূৰণ কৰিবলৈ সক্ষম হৈছে ।
মৎস্য পালনৰ জৰিয়তে সম্পূৰ্ণ স্বাৱলম্বী হোৱা উমানন্দৰ দাবী যে, গ্ৰামাঞ্চলৰ যুৱকসকলে কৰ্ম সংস্থাপনৰ বাবে বহিঃৰাজ্যলৈ ঢাপলি মেলাতকৈ কাম কৰাৰ সাহস গোটাব পাৰিলে কম মাটিতেই মৎস্যপালন কৰি স্ব-নিৰ্ভৰশীল হ’ব পাৰিব ।
লগতে পঢ়ক : গুৰুজনাৰ জন্মোৎসৱৰ দিনটোত ৰাষ্ট্ৰীয় বন্ধ ঘোষণা কৰক: বাবুল বৰা
