টিংখাং,5ছেপ্তেম্বৰঃ ৰাজ্যত আকৌ উলাইছে ভুৱা চিকিৎসক । এইবাৰ টিংখাঙত আৰক্ষীৰ জালত পৰিল মুন্নাভাই ৰূপী ভুৱা চিকিৎসক । টিংখাং আৰক্ষীয়ে শুকুবাৰে নিশা টিংখাঙ চাহ বাগিচাত কৰ্মৰত পংকজ কুমাৰ নাথ নামৰ ভুৱা চিকিৎসক জনক বাগিচাৰ পৰা গ্ৰেপ্তাৰ কৰে।
উল্লেখযোগ্য যে, জালিয়াতিৰে চিকিৎসকৰ ভুৱা পঞ্জীয়ন নম্বৰ ব্যৱহাৰ কৰি 2018 চনত টিংখাং চাহ বাগিচাত যোগদান কৰি সহজ-সৰল চাহ বাগিচাৰ লোকসকলৰ জীৱনৰ সৈতে হেতালি খেলি আহিছিল পংকজ কুমাৰ নাথে । স্বয়ম্ভূ চিকিৎসক জনৰ ঘৰ শোণিতপুৰ জিলাৰ গহপুৰ থালিপুখুৰী গাঁৱত বুলি জানিব পৰা গৈছে । টিংখাং আৰক্ষীয়ে ইতিমধ্যে ভুৱা চিকিৎসক জনৰ পৰা ভুৱা প্ৰমাণপত্ৰ, উকা প্ৰমানপত্ৰ , ছিল আদি জব্দ কৰিছে।
আনহাতে এই ভুৱা চিকিৎসকজনে অচ্যুত হাজৰিকা , ঋষভ হাজৰিকা , উদ্যম হাজৰিকা , পংকজ হাজৰিকা আদি বিভিন্ন ছদ্ম নাম লৈ উজনি অসমৰ বহু কেইখন চাহ বাগিছাত চিকিৎসা কৰি আহিছিল । উল্লেখযোগ্য যে, ধৃত চিকিৎসকজন ইয়াৰ পূৰ্বেও খুমটাই চাহ বাগিছাত চিকিৎসক হিচাপে কৰ্মৰত অৱস্থাত ২০১৬ চনত গ্ৰেপ্তাৰ হৈছিল বুলি জানিব পৰা গৈছে ।
লগতে পঢ়কঃ গৰু-ম'হৰ চোৰাং সৰবৰাহকাৰীৰ বিৰুদ্ধে সক্ৰিয় ধুবুৰী আৰক্ষী
