মৰাণ, 4 জানুৱাৰী: গ্ৰামাঞ্চলৰ প্ৰতিভা সমূহক আগুৱাই নিয়াৰ বাবে ডিব্ৰুগড় জিলাৰ অতি ভিতৰুৱা অঞ্চলৰ খোৱাংত স্থাপন কৰা হৈছিল শিলপুটা পাৰিজাত কলা সংগীত বিদ্যালয় ৷ দুগৰাকী যুৱতীৰ প্ৰচেষ্টাত আৰু গাঁওবাসীৰ সহযোগত গঢ় দিয়া এই পাৰিজাত কলা সংগীত বিদ্যালয়খনত প্ৰায় শতাধিক ছাত্ৰ-ছাত্ৰীয়ে প্ৰশিক্ষণ গ্ৰহণ কৰি আছে ৷ অতি দৰিদ্ৰ পৰিয়ালৰ ছাত্ৰ-ছাত্ৰী সকলৰ প্ৰতিভা বিকাশৰ ক্ষেত্ৰত সহায় কৰাৰ মানসেৰে গঢ় দিয়া শিলপুটা পাৰিজাত কলা সংগীত বিদ্যালয়ৰ দেওবাৰে প্ৰতিষ্ঠা দিৱস পালন কৰা হয় ৷ প্ৰতিষ্ঠা দিৱসৰ লগত সংগতি ৰাখি নৱনিৰ্মিত বিদ্যালয়ৰ গৃহটি উদ্বোধন কৰা হয় ।
উল্লেখ্য যে, মৰাণ সমষ্টিৰ বিধায়ক চক্ৰধৰ গগৈয়ে বৃহত্তৰ খোৱাং অঞ্চলৰ ছাত্ৰ-ছাত্ৰী সকলৰ প্ৰতিভা বিকাশৰ ক্ষেত্ৰত সহায় হ'ব পৰাকৈ হালধিবাৰী গাঁও পঞ্চায়তৰ অন্তৰ্গত শিলপুটাত সাংসদ এলেকাৰ উন্নয়ন পুঁজিৰ ২০১৯-২০ বৰ্ষৰ অধীনত 3 লাখ টকা ব্যয়ৰে নিৰ্মাণ কৰা পাৰিজাত কলা সংগীত বিদ্যালয়ৰ গৃহটো উদ্বোধন কৰে। এই অনুষ্ঠানত অঞ্চলটোৰ বহু কেইজন বিশিষ্ট ব্যক্তিৰ লগতে ছাত্ৰ-ছাত্ৰী আৰু অভিভাৱক সকল উপস্থিত থাকে ৷
লগতে পঢ়ক: বিশিষ্ট সাহিত্যিক ভৱপ্ৰসাদ চলিহালৈ ২০২০ বৰ্ষৰ শ্ৰীমন্ত শংকৰদেৱ বঁটা
