চাবুৱাত মুখ্যমন্ত্ৰী আৰু বিনোদ হাজৰিকাৰ, কলিয়াবৰত কেশৱ মহন্তৰ বাসগৃহ ঘেৰাও প্ৰতিবাদকাৰীৰ

সমষ্টিয়ে সমষ্টিয়ে প্ৰতিবাদকাৰীয়ে ঘেৰাও কৰিছে মন্ত্ৰী বিধায়কৰ বাসগৃহ ৷ বুধবাৰে ক্ষুদ্ধ জনতাই ঘেৰাও কৰিলে মুখ্যমন্ত্ৰীৰ বাসগৃহ ৷ প্ৰতিবাদকাৰীৰ ৰোষৰ পৰা বাচি ন'গল বিধায়ক নৰেণ সোনোৱাল , বিনোদ হাজৰিকা তথা মন্ত্ৰী কেশৱ মহন্তও ৷

নিউজ ডেক্স , 11 ডিচেম্বৰঃ কেব বাতিলৰ দাবীত বুধবাৰে চাবুৱাস্থিত মুখ্যমন্ত্ৰীৰ গৃহ গাঁও বিন্ধাকটা মুলুক গাঁৱত সৃষ্টি হয় এক উত্তপ্ত পৰিস্থিতিৰ ৷ হাজাৰ হাজাৰ প্ৰতিবাদকাৰীৰ প্ৰতিবাদত অচল হৈ পৰিল মুখ্যমন্ত্ৰীৰ গৃহ চহৰ চাবুৱা ৷ সহস্ৰাধিক শ্ৰমিক ৰাইজে ঘেৰাও কৰিলে মুলুক গাঁওস্থিত মুখ্যমন্ত্ৰীৰ বাসগৃহ ৷ বাগিচা বন্ধ কৰি প্ৰতিবাদত নামিল হাজাৰ হাজাৰ শ্ৰমিক ৷ মুখ্যমন্ত্ৰীৰ বাসগৃহৰ সমুখতে টায়াৰ জ্বলাই মুখ্যমন্ত্ৰী মুৰ্দাবাদ ধ্বনি দিলে প্ৰতিবাদকাৰীয়ে ৷ পৰিস্থিতি নিয়ন্ত্ৰণৰ বাহিৰলৈ যোৱাত আৰক্ষীৰ সৈতে হতাহতি লিপ্ত হয় প্ৰতিবাদকাৰীসকল ৷

অনুৰূপভাৱে চাবুৱাৰ বিধায়ক বিনোদ হাজৰিকাৰ বাসগৃহ ঘেৰাও কৰে স্থানীয় দল সংগঠন তথা চাবুৱাবাসী ৰাইজে ৷ বিধায়কজনৰ প্ৰতীকী ফাঁচী দিয়ে ক্ষোভিত জনতাই ৷ আনহাতে চাবুৱাৰ চাৰিআলিৰ ৰাজপথতে সকলো ৰাইজে অৱস্থান কৰি সাব্যস্ত কৰে তীব্ৰ প্ৰতিবাদ ৷ স্বস্তঃফুৰ্তভাৱে ওলাই অহা চাবুৱাবাসী ৰাইজৰ প্ৰতিবাদত একপ্ৰকাৰ অচল হৈ পৰে মুখ্যমন্ত্ৰীৰ গৃহ চহৰ চাবুৱা ৷ আনহাতে কলিয়াবৰত অগপ মন্ত্ৰী কেশৱ মহন্তৰ বাসগৃহ ঘেৰাও কৰিলে ক্ষুদ্ধ জনতাই ৷ আছুৰ প্ৰাক্তন সভাপতিজনক চৰকাৰ ত্যাগ কৰি অসমীয়াৰ আবেগ-অনুভূতিক সন্মান জনাবলৈ তীব্ৰ সকিয়নীৰে কলিয়াবৰৰ ছাত্ৰ আৰু যুৱ সমাজে ঘেৰাও কৰিলে কলিয়াবৰৰ বালি সত্ৰস্থিত মন্ত্ৰীজনৰ বাসগৃহ ৷ প্ৰতিবাদী ছাত্ৰ-ছাত্ৰীয়ে মহন্ত বিৰোধী ধ্বনিৰে কঁপাই তোলে সমগ্ৰ অঞ্চল ৷ আছু, অসম জাতীয়তাবাদী যুৱ ছাত্ৰ পৰিষদৰ লগতে প্ৰায় পাঁচ সহস্ৰাধিক প্ৰতিবাদকাৰীয়ে বুধবাৰে ঘেৰাও কৰে নাহৰকটীয়াৰ অগপৰ বিধায়ক নৰেণ সোনোৱালৰ বাসগৃহ । নাহৰকটীয়া নগৰ সমিতিৰ সভাপতি তথা ডিব্ৰুগড় জিলা বিজেপিৰ সভাপতি মুকুট ৰাজকোঁৱৰ আৰু বিজেপিৰ যুৱ মৰ্চাৰ ৰাজ্যিক উপ সভাপতি তৰংগ গগৈৰ বাসগৃহও ঘেৰাও কৰে প্ৰতিবাদকাৰীয়ে ৷ নাহৰকটীয়াৰ ৰাজপথতে বিজেপিৰ পতকাও জ্বলাই দিয়ে প্ৰতিবাদকাৰীসকলে ৷

লগতে পঢ়কঃকাক বিশ্বাস কৰিব অসমীয়াই ? বীৰেন্দ্ৰ প্ৰসাদ বৈশ্য, বিশ্বজিত দৈমাৰীক !