মৰাণ, 3 জুলাই : ফেনে-ফোটোকাৰে বাঢ়িছে বুঢ়ীদিহিং নৈ । বুঢ়ীদিহিং নদীৰ বানৰ কবলত টিংখাঙৰ বিস্তীৰ্ণ অঞ্চল (Flood in Tingkhong) । বাঢ়নী পানীয়ে প্ৰভাৱ পেলাইছে টিংখাঙৰ ন-খাট পঞ্চায়তৰ অন্তৰ্গত চহৰীকটা, 2 নং শলগুৰি আৰু 1 নং শলগুৰিৰ গাঁৱৰ বিস্তৃত অঞ্চল । সম্পূৰ্ণভাৱে পানীৰ তলত জাহ গৈছে কৃষি প্ৰধান অঞ্চলটোৰ ৰবি শস্যৰ পথাৰ । যাৰ ফলত এতিয়া পানীত হাঁহ নচৰা অৱস্থাৰ সৃষ্টি হৈছে কৃষক ৰাইজৰ মাজত ।
কপালৰ ঘাম মাটিত পেলাই কৰা কষ্টৰ ফচল কুমলীয়াতে চিঙি পেলাব লগীয়া হৈছে । বহুতৰ ঘৰ-দুৱাৰত পানী সোমোৱাৰ লগতে যাতায়ত-যোগাযোগ ব্যৱস্থা বন্ধ হৈ পৰিছে । টুলুঙা নাৱেৰে এতিয়া বিপদ সংকুলভাৱে যাত্ৰা কৰিবলগীয়া হৈছে বন্যাৰ্তসকলে । ইতিমধ্যে চৰকাৰ প্ৰশাসনৰ তৰফৰ পৰা অঞ্চলসমূহত প্ৰয়োজনীয় বান সাহায্য বিতৰণ কৰা হৈছে ।
দেওবাৰে উক্ত বানপীড়িত অঞ্চলসমূহ পৰিদৰ্শন কৰে স্থানীয় বিধায়ক তথা মন্ত্ৰী বিমল বৰাই । ডিব্ৰুগড় জিলা উপায়ুক্তৰ লগতে অন্যান্য প্ৰশাসনীয় বিষয়াক লগত লৈ মন্ত্ৰীগৰাকীয়ে বানক্ৰান্ত অঞ্চলসমূহ পৰিদৰ্শন কৰি বানাক্ৰান্ত সকলৰ মনৰ বুজ লয় । টিংখাঙৰ বান পৰিস্থিতি বুজ লৈ জিলা উপায়ুক্তগৰাকীয়ে কয়, প্ৰতিজন বানত ক্ষতিগ্ৰস্ত লোকক ক্ষতিপূৰণ দিয়াৰ ব্যৱস্থা কৰিব প্ৰশাসনে ৷
লগতে পঢ়ক : ৰাজ্যত অব্যাহত বানৰ বিভীষিকা: ২৪ ঘণ্টাত আঠজনৰ প্ৰাণহানি
