ডিব্ৰুগড়, 10 এপ্ৰিল : সুদীৰ্ঘ দুটা বৰ্ষৰ পাচত ডিব্ৰুগড় বিশ্ববিদ্যালয়ৰ স্নাতকোত্তৰ মহলাৰ ছাত্ৰ একতা সভাৰ নিৰ্বাচন তীব্ৰ প্ৰতিদ্বন্দীতামূলক ভাৱে অনুষ্ঠিত হৈ যায় ৷ বিগত বৰ্ষত সমূহত নিজৰ স্থিতি সবল কৰি ৰখা আছুৱে এইবাৰ নিৰ্বাচনত ভাল ফল দেখুৱাবলৈ সক্ষম নহ'ল ৷ কিন্তু সভাপতি, সম্পাদককে ধৰি কেইবাখনো আসনত অতি কম ভোটৰ ব্যৱধানতহে পৰাজয় বৰণ কৰে আছু সমৰ্থিত কেইবাজনো চিনাকী মূখৰ প্ৰাৰ্থীয়ে ৷
যোৱা নিশা ভাগত প্ৰকাশ কৰা ডিব্ৰুগড় বিশ্ববিদ্যালয়ৰ স্নাতকোত্তৰ মহলাৰ ছাত্ৰ একতা সভাৰ নিৰ্বাচনৰ ফলাফল অনুসৰি আগন্তুক বৰ্ষৰ বাবে সাধাৰণ সম্পাদক পদত জয়ী হয় হিমালয় বাৰিক। আনহাতে সভাপতি পদত জয়ী হয় পৱন গগৈ।
সাধাৰণ সম্পাদক পদত আছুৰ সমৰ্থনত প্ৰতিদ্বন্দীতা আগবাঢ়োৱা লব্ধ প্ৰতিম দাসে 1608 টা ভোট লাভ কৰাৰ বিপৰীতে হিমালয় বাৰিকে 1678 টা ভোট লাভ কৰি বিজয় সাব্যস্ত কৰে ৷ ইফালে আছুৰ সমৰ্থনৰ বহু চৰ্চিত সভাপতি পদৰ প্ৰাৰ্থী ধৃতিষা গগৈয়ে 1614 টা ভোট লাভ কৰাৰ বিপৰীতে পৱন গগৈয়ে 1670 টা ভোট লাভ কৰি বিজয় সাব্যস্ত কৰে। সমান্তৰালভাৱে সভাপতি পদতো আছু সমৰ্থীত বিশাল কুমাৰ শৰ্মা 1383 ভোট লাভ কৰি দ্বিতীয় স্থানত থকাৰ বিপৰিতে লক্ষীনন্দন তায়ে 1395 ভোট লাভ কৰি বিজয় সাব্যস্ত কৰে।
