ধুবুৰী,6 ফেব্ৰুৱাৰীঃ ধুবুৰীৰ ভাৰত-বাংলা সীমান্তৰ অন্যতম গুৰুত্বপূৰ্ণ অংশ হৈছে সোনাহাট আন্তঃৰাষ্ট্ৰীয় বাণিজ্য কেন্দ্ৰ । ২০১৪ চনত আৰম্ভ হোৱা বাণিজ্য কেন্দ্ৰটোৰ জৰিয়তে প্ৰতিদিনে বাংলাদেশলৈ ৰপ্তানি কৰা হয় বৃহৎ পৰিমাণৰ শিল ৷ যাৰ বিনিময়ত ভাৰত চৰকাৰে প্ৰতিদিনে লাভ কৰে বৃহৎ পৰিমাণৰ ৰাজহ ৷
উল্লেখ্য যে,২০১৪ চনত ধুবুৰীৰ ভাৰত-বাংলা সীমান্তৱৰ্তী গোলকগঞ্জৰ সোনাহাটত শুভাৰম্ভ কৰা হৈছিল সোণাহাট আন্তঃৰাষ্ট্ৰীয় বাণিজ্য কেন্দ্ৰৰ । পৰৱৰ্তী সময়ত এই বাণিজ্য কেন্দ্ৰৰ যোগেদি বাংলাদেশলৈ শিল আৰু কয়লা ৰপ্তানি কৰা হৈছিল ৷ সম্প্ৰতি ভাৰতৰ পৰা প্ৰতিদিনে প্ৰায় 2,500 হাজাৰ টন শিল ৰপ্তানি কৰা হয় বাংলাদেশলৈ ৷ অৰ্থাৎ দৈনিক প্ৰায় 100খন ট্ৰাকে বাংলাদেশলৈ কঢ়িয়ায় নিয়ে শিল । সমান্তৰালভাৱে বাংলাদেশৰ পৰা মাজে-সময়ে ভাৰতলৈ ৰিফাইন তেল,প্লাই,প্লাষ্টিকৰ ফাৰ্ণিচাৰ আৰু বাচন-বৰ্তনকে ধৰি বিভিন্ন প্লাষ্টিকৰ সামগ্ৰী,তুলা,কাপোৰ আদি সামগ্ৰীৰ আমদানি কৰা হয় ৷ যাৰ বিনিময়ত ভাৰত চৰকাৰে প্ৰতিদিনে ৰাজহ হিচাপে লাভ কৰে প্ৰায় পঁচিশ হাজাৰ বাংলাদেশী টকা ৷ স্থানীয় লোকসকলৰ লগতে সমগ্ৰ ধুবুৰী জিলাখনৰ প্ৰায় দহৰ পৰা পোন্ধৰ হাজাৰ পৰিয়াল ইয়াৰ সৈতে জড়িত হৈ জীৱিকা নিৰ্বাহৰ পথ বিচাৰি লৈছে ৷ মুঠৰ ওপৰত অসমৰ সীমান্তৱৰ্তী জিলাখনলৈ কৰ্মসংস্থাপনৰ সু-খবৰ কঢ়িয়াইছে এইটো বাণিজ্য কেন্দ্ৰই ৷
ৰপ্তানিকাৰীসকলে অভিযোগ কৰা মতে,কেন্দ্ৰীয় শুল্ক বিভাগে ট্ৰাক সমূহৰ নথি-পত্ৰকে ধৰি সকলো দিশ অনুসন্ধান কৰি এক বৈধ পাৰপত্ৰ প্ৰদান কৰে ৷ পাৰপত্ৰ লাভৰ পিছত সীমান্ত অতিক্ৰম কৰি শিল ভৰ্তি ট্ৰাকসমূহ বাংলাদেশলৈ যাত্ৰা কৰে ৷ কিন্তু বাংলাদেশৰ প্ৰৱেশদ্বাৰত সীমান্ত সুৰক্ষা বাহিনীয়ে শুল্ক বিভাগে প্ৰদান কৰা নথি সংগ্ৰহ কৰি ৰখাৰ নামত বিভিন্ন অজুহাত দেখুৱাই অযথা হাৰাশাস্তি কৰি অহাৰ গুৰুতৰ অভিযোগ উত্থাপন কৰিছে ।
প্ৰতি মাহে কমেও পাঁচ লাখ বিদেশী টকাৰ ৰাজহৰ বিপৰীতে বছৰত প্ৰায় পঞ্চাশৰ পৰা ষাঠি লাখ টকাৰ ৰাজহ এইটো আন্তঃৰাষ্ট্ৰীয় বাণিজ্য কেন্দ্ৰৰ পৰা ভাৰত চৰকাৰে লাভ কৰি আহিছে ৷ কিন্তু ৰাজহ বৃদ্ধিৰ বাবে ৰাজ্য আৰু কেন্দ্ৰীয় চৰকাৰে বিভিন্ন বিভাগক নিৰ্দেশ দি অহাৰ সময়তে সোনাহাট আন্তঃৰাষ্ট্ৰীয় বাণিজ্য কেন্দ্ৰৰ ৰাজহ বৃদ্ধিৰ ক্ষেত্ৰত গুৰুত্ব দিয়া পৰিলক্ষিত নহ’ল । এইক্ষেত্ৰত দৃষ্টি নিক্ষেপ কৰাৰ বাবে চৰকাৰক দাবী জনাইছে ৰপ্তানিকাৰীসকলে ।
