ধুবুৰী, 19 চেপ্তেম্বৰঃ আন্তঃৰাষ্ট্ৰীয় চোৰাং বেহা তথা চোৰাং ছিণ্ডিকেটৰ বিৰুদ্ধে ধুবুৰী আৰু কোকৰাঝাৰ আৰক্ষীয়ে অব্যাহত ৰাখিছে অভিযান । ধুবুৰীৰ গৌৰীপুৰ আৰু কোকৰাঝাৰত গৰুৰ চোৰাং সৰবৰাহক লৈ ৰুজু হৈ থকা পৃথক গোচৰৰ ভিত্তিত কিছুদিনৰ পৰা আৰক্ষীয়ে ধাৰাবাহিকভাৱে অব্যাহত ৰাখিছে অভিযান । গৌৰীপুৰ আৰক্ষী থানাত ৮৭৬/১৯ নম্বৰত ৰুজু হোৱা গোচৰৰ ভিত্তিত ইতিমধ্যে ধুবুৰী আৰক্ষীয়ে অভিযান চলাই বাংলাদেশলৈ গৰুৰ চোৰাং সৰবৰাহ চলাই অহা ছিণ্ডিকেটৰ জাহাঙ্গীৰ আলম আৰু আব্দুল জুব্বাৰকে ধৰি সাত জনকৈ মূল অভিযুক্তক গ্ৰেপ্তাৰ কৰিছে। ইয়াৰ পিছতেই কোকৰাঝাৰ আৰক্ষীয়ে যোৱা ছয় চেপ্তেম্বৰত অভিযান চলাই ছিণ্ডিকেটৰ আন এজন অভিযুক্ত মুন্না শইকীয়াক গ্ৰেপ্তাৰ কৰিবলৈ সক্ষম হয় । কোকৰাঝাৰ আৰক্ষীয়ে ধৃত মুন্না শইকীয়াক জেৰা কৰাৰ পিছত বুধবাৰে কোকৰাঝাৰ আদালতৰ জৰিয়তে ট্ৰেঞ্জিট ৰিমাণ্ডত নিয়ে গৌৰীপুৰ আৰক্ষীয়ে । আনহাতে গৌৰীপুৰ আৰক্ষীয়ে মুন্না শইকীয়াক ধুবুৰী আদালতত হাজিৰ কৰাই পুনৰ সাত দিনৰ বাবে নিজৰ জিম্মালৈ বিচাৰে যদিও আদালতে চাৰি দিনৰ বাবে গৌৰীপুৰ আৰক্ষীৰ জিম্মালৈ প্ৰেৰণ কৰে মুন্না শইকীয়াক।
ইপিনে ধুবুৰী আদালতত হাজিৰ হোৱাৰ সময়ত সংবাদ মাধ্যমৰ কেমেৰাৰ আগত কোনো ছিণ্ডিকেটৰ সৈতে জড়িত নহয় বুলি কৈ ক্ষোভ উজাৰিলে মুন্না শইকীয়াই। ছিণ্ডিকেটৰ গোপন তথ্য পোহৰলৈ অহাৰ প্ৰতি লক্ষ্য কৰি তেওঁক সংবাদ মাধ্যমৰ পৰা আঁতৰত ৰখা হৈছে বুলিও উল্লেখ কৰে । আনহাতে যোৱা চাৰিটা বছৰে ছিণ্ডিকেটৰ বিৰুদ্ধে মাত মতাৰ বাবেই এই পৰিণাম ভুগিব লগীয়া হৈছে বুলি উল্লেখ কৰি চৰকাৰৰ বিৰুদ্ধে ক্ষোভ উজাৰিলে ধৃত মুন্না শইকীয়াই।
বৃহস্পতিবাৰে ধুবুৰী আদালতে মুন্না শইকীয়াক চাৰি দিনৰ বাবে গৌৰীপুৰ আৰক্ষীৰ জিম্মালৈ দিয়াৰ পিছত আৰক্ষীয়ে ধৃত মুন্না শইকীয়াৰ পৰা ছিণ্ডিকেটৰ কি তথ্য উদ্ঘাটন কৰিবলৈ সক্ষম হয় সেয়া পৰৱৰ্তী সময়তহে স্পষ্ট হ'ব । যদিও এই ক্ষেত্ৰত কোনো মন্তব্য দিয়া নাই ধুবুৰী আৰক্ষীয়ে। উল্লেখযোগ্য যে, গৰুৰ ছিণ্ডিকেট চক্ৰৰ বিৰুদ্ধে আৰক্ষীয়ে অভিযান চলাই এতিয়ালৈকে আঠজনক গ্ৰেপ্তাৰ কৰাৰ লগতে অভিযান অব্যাহত ৰাখিছে আৰক্ষীয়ে৷
