পশ্চিম বিলাসীপাৰা, ১৩ মে': ক'ভিড বিধি উলংঘা কৰা ব্যৱসায়িক প্ৰতিষ্ঠানৰ বিৰুদ্ধে কঠোৰ স্থিতি গ্ৰহণ প্ৰশাসনৰ । বৃহস্পতিবাৰে বিলাসীপাৰাত 'M Bazar' নামৰ শ্বপিং মলটো ছীল কৰে প্ৰশাসনে । মহকুমা দণ্ডাধীশ অনিৰ্দিষ্টকালৰ বাবে ছীল কৰে শ্বপিং মলটো । ক'ভিড বিধি উলংঘা কৰি ব্যৱসায় চলাই থকাৰ অভিযোগ উত্থাপিত হৈছে 'M Bazar' কৰ্তৃপক্ষৰ বিৰুদ্ধে ।
বৃহস্পতিবাৰে বিলাসীপাৰা মহকুমা দণ্ডাধীশৰ উপস্থিতিত আৰক্ষীয়ে অনিৰ্দিষ্ট কালৰ বাবে শ্বপিং মলটো ছীল কৰি দিয়ে । লগতে শ্বপিং মলটোত কৰ্মৰত চাৰিজন কৰ্মচাৰীক আৰক্ষীয়ে আটক কৰে ।
বৰ্তমান ক'ভিড আক্ৰান্তৰ সংখ্যা বৃদ্ধি হৈ থকাৰ পৰিপ্ৰেক্ষিতত সংক্ৰমণ ৰোধৰ বাবে প্ৰয়াস অব্যাহত আছে । চৰকাৰে কেতবোৰ কঠোৰ নীতিও অৱলম্বন কৰিছে । কিন্তু শ্বপিং মলটোত সামাজিক দূৰত্ব বৰ্তাই ৰখাকে ধৰি আন ক'ভিড বিধি মানি নচলাৰ অভিযোগ উত্থাপিত হৈছে ।
লগতে পঢ়ক: নতুন ক’ভিড নীতিঅনুসৰি অস্থায়ী ব্যৱসায় প্ৰতিষ্ঠান বন্ধ কৰিলে মৰাণ প্ৰশাসনে
