জোনাই, ৩১ আগষ্ট: জোনাইৰ চিমেন চাপৰি আৰক্ষী থানাৰ চিমেন চাপৰি বাঘগাঁৱত সংঘটিত হৈছে এক শোকাবহ তথা চাঞ্চল্যকৰ ঘটনা । আদ্যশ্ৰাদ্ধৰ মাজতে এগৰাকী মহিলাৰ দাৰ ঘাপত গুৰুতৰভাৱে আহত আন এগৰাকী মহিলা(Woman attack women With Sharp Weapon) ৷ আহত মহিলাগৰাকী চিমেন চাপৰি বাঘগাঁৱৰ দীনাৰাম শইকীয়াৰ পত্নী অমিয়া শইকীয়া(৫৫) বুলি জানিব পৰা হৈছে ৷
ঘটনাৰ বিৱৰণী মতে চিমেন চাপৰি বাঘগাঁৱৰ দীনাৰাম শইকীয়াৰ পত্নী অমিয়া শইকীয়া(৫৫)ই একেগাঁৱৰ তপন বৰুৱাৰ বছৰেকীয়া শ্ৰাদ্ধলৈ যায় । সকলোৱে আহাৰ গ্ৰহণ কৰাৰ পাছত অমিয়া শইকীয়াই পেলনীয়া আহাৰ বাহিৰত পেলাবলৈ যাওঁতে বাহিৰত অপেক্ষা কৰি থকা একেগাঁৱৰ প্ৰয়াত ভোগীৰাম বৰাৰ জী মিনাক্ষী বৰাই(৪৬) তেওঁক চোকা দাৰে উপৰ্যুপৰি আঘাত হানে ৷
সমগ্ৰ ঘটনা প্ৰত্যক্ষ কৰি, আন এগৰাকী মহিলা আগবাঢ়ি আহি বাধা দিয়াতহে অমিয়া শইকীয়া মৃত্যুৰ মুখৰ পৰা কথমপি ৰক্ষা পৰে(Attack with sharp weapon) ৷ কিন্তু এই আক্ৰমণত মূৰত বিষমভাৱে আঘাতপ্ৰাপ্ত হয় অমিয়া শইকীয়া ৷ তেওঁক ততাতৈয়াকৈ ডেকাপাম প্ৰাথমিক স্বাস্থ্যকেন্দ্ৰত ভৰ্তি কৰোৱা হয় । মূৰত পাঁচটা চিলাই পৰা উপৰি হাতত আঘাত পাইছে অমিয়া শইকীয়াই ।
পাছত ঘটনা সন্দৰ্ভত চিমেন চাপৰি আৰক্ষী থানাত এজাহাৰ দাখিল কৰে ভুক্তভোগী অমিয়া শইকীয়াৰ পৰিয়ালৰ লোকে । জানিব পৰা মতে, এজাহাৰৰ ভিত্তিত চিমেন চাপৰি আৰক্ষীয়ে মিনাক্ষী বৰাক ঘৰৰ পৰা আটক কৰি লৈ যায় । আনহাতে অমিয়া শইকীয়াক উন্নত চিকিৎসাৰ বাবে ডিব্ৰুগড়লৈ লৈ অনাৰ বাবে যোজা চলাই থকা হৈছে ৷ বৰ্তমানলৈ জানিব পৰা হোৱা নাই এই আক্ৰমণৰ প্ৰকৃত কাৰণ ৷
লগতে পঢ়ক : সংস্থাপনহীনতাক প্ৰত্যাহ্বান জনাইছে ৰঙিয়াৰ একাংশ পুৰুষ-মহিলাই
