জোনাই, ২৫ অক্টোবৰ : অসমৰ শিক্ষা মন্ত্ৰী ডাঃ ৰণোজ পেগুৰ (Education Minister Ranoj Pegu) গৃহ জিলা ধেমাজিৰ জোনাইত শিক্ষা বিভাগৰ নাভূত-নাশ্ৰুত কাণ্ড । সংঘটিত হৈছে ইটোৰ পিছত সিটো আজৱ ঘটনা । পোকে ধৰা পচা চাউল মধ্যাহ্ন ভোজনৰ (Midday meal) নামত কণ কণ ছাত্ৰ-ছাত্ৰীক দিয়াৰ পিছত এইবাৰ আৰু এটা আজৱ ঘটনা সংঘটিত হৈছে জোনাইৰ চৌৰাংশ্ৰী বড়ো প্ৰাথমিক বিদ্যালয়ত ।
ব্ৰহ্মপুত্ৰ নৈৰ দাঁতিকাষৰীয়া ধেমাজি আৰু ডিব্ৰুগড় জিলাৰ সীমান্তৰ চেৰেং চিৰি গাঁৱৰ চৌৰাংশ্ৰী বড়ো প্ৰাথমিক বিদ্যালয়ত সংঘটিত হৈছে এই নাভূত-নাশ্ৰুত কাণ্ড । বিদ্যালয়খনৰ প্ৰধান শিক্ষক দীননাথ পাতিৰে নামানে চৰকাৰে দিয়া কোনো নীতি নিয়ম । নামানে বিদ্যালয়ৰ পাঠদানৰ সময়সূচী । যেতিয়াই মন যায় তেতিয়াই আহে বিদ্যালয়লৈ (Teachers irregularity in Jonai school) ।
ছাত্ৰ-ছাত্ৰীসকলে পুৱা ৯ বজাতে বিদ্যালয়ত আহি উপস্থিত হৈ শিক্ষকলৈ অপেক্ষা কৰি থাকে । তেওঁ আহিব বুলি বহু সময় অপেক্ষা কৰি ছাত্ৰ-ছাত্ৰীসকল পাঠ গ্ৰহণ নকৰাকৈয়ে পুনৰ ঘৰলৈ উভতি যাবলগা হয় । ইয়াৰ উপৰি বিদ্যালয়খনৰ প্ৰধান শিক্ষক দীননাথ পাতিৰে বছৰ বছৰ ধৰি ছাত্ৰ-ছাত্ৰীসকলক বঞ্চিত কৰি ৰাখিছে মধ্যাহ্ন ভোজনৰ পৰাও ।
