দৰং,8 মাৰ্চঃ জনশিক্ষণ সংস্থান দৰঙৰ উদ্যোগত ভাৰত চৰকাৰৰ দক্ষতা বিকাশ আৰু উদ্যমিতা মন্ত্রালয়ৰ পৃষ্ঠপোষকতাত দেওবাৰে মঙলদৈত দিনযোৰা কাৰ্যসূচীৰে আন্তৰ্জাতিক নাৰী দিৱস উদযাপন কৰা হয় । নাৰী দিৱসৰ কাৰ্যসূচী অনুসৰি পুৱা ৭.৩০ বজাত সমূহীয়া চাফাই,৮ বজাত বৃক্ষৰোপন কাৰ্যসূচীৰ পিছত ৯ বজাত বন্তি প্রজ্বলন কৰে জন শিক্ষণ সংস্থান দৰঙৰ উপাধ্যক্ষ তথা জিলা ৰেচম বিভাগৰ সহকাৰী সঞ্চালক যোগেশ চন্দ্র তালুকদাৰে । ৯.৩০ বজাত "মহিলাৰ সম অধিকাৰ আৰু সম মৰ্যদাহে সমাজৰ সুস্থিৰতা আনিব"-শীৰ্ষক বিষয়ত অনুষ্ঠিত বক্তৃতানুষ্ঠানত হিমানী কাকতি দাসে প্ৰথম স্থান, প্ৰেমদা ডেকা নাথে দ্বিতীয় স্থান, বন্দনা দেৱী আৰু আনোৱাৰা বেগমে যুটীয়াভাৱে তৃতীয় স্থান লাভ কৰে ।
দিনৰ ১১.৪৫বজাত দৰং জিলা মহিলা সমিতিৰ সভানেত্রী ৰাণী দেৱীৰ সভাপতিত্বত অনুষ্ঠিত হোৱা মুকলি সভাত মুখ্য অতিথিৰূপে অংশগ্ৰহণ কৰে স্থানীয় বিধায়ক গুৰুজ্যোতি দাসে ৷ দাসে মহিলাসকললৈ আন্তৰ্জাতিক মহিলা দিৱসৰ শুভেচ্ছা জ্ঞাপন কৰি মহিলাসকলে নিজ নিজ কৰ্মদক্ষতাৰে স্বাৱলম্বী হ’বলৈ সক্ষম হৈছে বুলি উল্লেখ কৰে ৷ লগতে নাৰীসকলৰ ইচ্ছা-আকাংক্ষাৰ বাবেহে সমাজখন আগুৱাই গৈছে বুলি উল্লেখ কৰে । মহিলাসকলক আনৰ সমালোচনা,বদনামক আওকাণ নকৰি আগবাঢ়ি গৈ সমাজখনক উন্নতিৰ পথত আগুৱাই নিবলৈ আহ্বান জনায় ৷
লগতে চাওকঃনাৰী দিৱস উপলক্ষ্যে ডিমা হাছাওত সন্মানীত তিনি মহিলা
