দৰং,18 এপ্ৰিল : বাইহাটা চাৰিআলি থানাৰ অন্তৰ্গত ডুমুনিচকীত দেওবাৰে পুৱতি নিশা 3 বজাত সংঘটিত হয় এক পথ দুৰ্ঘটনা ৷ ফলত জীৱন্তে অগ্নিদগ্ধ হৈ নিহত হয় এজন লোক । লগতে আহত হয় 17 গৰাকীকৈ যাত্ৰী ৷
বাইহাটা চাৰিআলিত পথ দুৰ্ঘটনা
অগ্নিদগ্ধ লোকজন চালক চিটত উদ্ধাৰ হোৱা বাবে লোকজন চালক বুলি সন্দেহ কৰা হৈছে ৷ প্ৰত্যক্ষদৰ্শীয়ে জনোৱা মতে, NL-01-AA-0972 নম্বৰৰ সৰু বাহন কঢ়িওৱা এখন কণ্টেইনাৰ ট্ৰাক মঙলদৈৰ পৰা বাইহাটা অভিমুখে গৈ থকা অৱস্থাতে তিনিচুকীয়ামুখী AR-01-G-3966 নম্বৰৰ নৈশ বাছখনৰ সৈতে মুখামুখি সংঘৰ্ষ হয় ৷ ইয়াৰ পাচতে বাছখনত জুইৰ সূত্ৰপাত হৈ দাউ দাউকৈ জ্বলি উঠে আৰু 90 শতাংশই জ্বলি ছাই হয় ৷
ইফালে আহত যাত্ৰী কেইগৰাকীক বাইহাটা চাৰিআলি থানাই উদ্ধাৰ কৰিবলৈ সক্ষম হয় যদিও এগৰাকীৰ অৱস্থা সংকটজনক বুলি জানিব পৰা গৈছে ৷
লগতে পঢ়ক : ধুবুৰীত আৰক্ষীৰ অভিযানত জব্দ 39 টা চোৰাং পশুধন
