দৰং , 08 মে' : দৰং জিলাৰ ছিপাঝাৰ সমষ্টিৰ মঙলদৈ-মাজিকুছি পথটোৱে জ্বলা-কলা খুৱাইছে সাধাৰণ ৰাইজক ৷ পঞ্চায়ত নিৰ্বাচনৰ পূৰ্বে নিৰ্বাচনী চমক সৃষ্টি কৰি মন্ত্ৰী পীয়ূষ হাজৰিকাই এই পথটোৰ বাবে আধাৰশিলা স্থাপন কৰিছিল ৷ কিন্তু আধাৰশিলা স্থাপন কৰাৰ 6 মাহ উকলি যোৱাৰ পিচতো পথ নিৰ্মাণ নোহোৱাৰ অভিযোগ অঞ্চলবাসীৰ ৷
ছিপাঝাৰ সমষ্টিৰ মঙলদৈ-মাজিকুছি পথটোত মেৰামতিৰ অভাৱত পুখুৰীসদৃশ গাঁতৰ সৃষ্টি হৈছে ৷ পথৰ এনে দুৰৱস্থাৰ বাবে যাতায়ত কৰাত ৰাইজে সমস্যাৰ সন্মুখীন হ'বলগীয়া হৈছে ৷ অঞ্চলবাসীয়ে জনোৱা অনুসৰি 2018 চনৰ 2 নৱেম্বৰত মন্ত্ৰী পীয়ূষ হাজৰিকাই ছিপাঝাৰ সমষ্টিৰ বিধায়ক বিনন্দ কুমাৰ শইকীয়াৰ উপস্থিতিত ৰাজ্যিক স্ব-অগ্ৰাধিকাৰ উন্নীতকৰণ আঁচনিৰ অধীনত সৰাবাৰীত আধাৰশিলা স্থাপন কৰিছিল ৷ কিন্তু সময় উকলি যোৱাৰ লগে লগে 2,35.66 লাখ টকাৰ এই আঁচনি ফুটুকাৰ ফেনত পৰিণত হোৱাৰ অভিযোগ উত্থাপন হৈছে ৷
উল্লেখ্য যে পঞ্চায়ত আৰু লোকসভা নিৰ্বাচনত ভোটাৰক আকৰ্ষণ কৰিবলৈ দৰঙৰ কেইবাখনো নিৰ্বাচনী সভাত মন্ত্ৰী হিমন্ত বিশ্ব শৰ্মাই অংশ গ্ৰহন কৰিছিল ৷ কিন্তু কি কাৰণত আধাৰশিলা স্থাপন কৰা 6 মাহ পাচতো লাখটকীয়া আঁচনিৰ মঙলদৈ-মাজিকুছি পথটো নিৰ্মাণ নহ'ল , তাক পৰ্যবেক্ষণ কৰিবলৈ গড়কাপ্তানী মন্ত্ৰী হিমন্ত বিশ্ব শৰ্মাৰ আহৰি নোহোৱাৰ অভিযোগ উত্থাপিত হৈছে ৷ এতিয়া সাধাৰণ জনতাৰ প্ৰশ্ন যে কেতিয়া নিৰ্মাণ হ'ব এই লাখটকীয়া আঁচনিৰ পথ ?
