মঙলদৈ তৰণি সংঘৰ অচলাৱস্থা, সাহাৰ্যৰ বাবে অনুৰোধ চৰকাৰলৈ

দেশজুৰি চলা লক ডাউনৰ বাবেই মঙলদৈ জিলা কাৰাগাৰৰ চৰকাৰী বেতন বিহীন তৰণি সংঘৰ প্ৰায় ১৫০ জন স্বেচ্ছাসেৱক কৰ্মচাৰীৰ আদালতৰ সাধাৰণ কামকাজ বন্ধ হৈ পৰিছে । যাৰ বাবে অৰ্থ সংকটত পৰিছে কৰ্মচাৰীসকল । সেয়হে শনিবাৰে চৰকাৰক সাহাৰ্যৰ বাবে অনুৰোধ জনাই বেতন বিহীন এই কৰ্মচাৰীসকলে ।

মঙলদৈ, ১৬ মে': কৰ'ণা ভাইৰাছ প্ৰতিৰোধৰ বাবে দেশজুৰি চলা লক ডাউনৰ পৰিপেক্ষিতত সমগ্ৰ দেশতেই শ্ৰমজীৱী জনসাধাৰণৰ জীৱন জীৱিকাৰ ক্ষেত্ৰত আহি পৰিছে কৰ্মহীনতা ৷ ইয়াৰ সমান্তৰালভাৱে জিলা সমুহৰ আদালত তৰণি সংঘৰ কৰ্মচাৰী সকলৰ মাজতো কৰ্মহীনতাই জীৱন জীৱিকাত বিৰূপ প্ৰভাৱ পেলোৱা পৰিলক্ষিত হৈছে ৷ মঙলদৈ জিলা কাৰাগাৰৰ চৰকাৰী বেতন বিহীন তৰণি সংঘৰ প্ৰায় ১৫০ জন স্বেচ্ছাসেৱক কৰ্মচাৰীৰ লকডাউন বাবে আদালতৰ সাধাৰণ কামকাজ বন্ধ হৈ পৰাত নিজৰ লগতে পৰিয়াল পোহপালৰ ক্ষেত্ৰত বিপৰ্যয়ৰ সন্মুখীন হৈছে ৷

তাৰোপৰি চৰকাৰে ঘোষণা কৰা কোনো আঁচনিতে এইসকল বেতন বিহীন কৰ্মচাৰীক অন্তৰ্ভূক্ত নকৰাৰ অভিযোগ উত্থাপন কৰে ৷ যাৰ বাাবে সংঘৰ সদস্য সকলে লকডাউনৰ সময়ত বেতন বিহীন কৰ্মচাৰী সকলৰ বাবে চৰকাৰক যি কোনো এটি আঁচনিৰ অন্তৰ্ভূক্ত কৰিবলৈ অনুৰোধ জনায় ।