চিৰাং, ১০ নৱেম্বৰ: বছৰ বছৰ ধৰি জনজাতিকৰণৰ মৰ্যাদা প্ৰদানৰ দাবী জনাই অহাৰ পাচতো আজি পৰ্যন্ত আদিবাসী সকলৰ দাবী পূৰণ নহ'ল । চৰকাৰে সমস্যা সমাধানৰ প্ৰতিশ্ৰুতি দিয়ে ঠিকেই; কিন্তু শাসনত অধিষ্ঠিত হোৱাৰ পাচতে প্ৰতিশ্ৰুতি পাহৰি যায় । সেয়ে, আদিবাসীসকলৰ সমস্যাৰ বিষয়ে প্ৰধানমন্ত্ৰী নৰেন্দ্ৰ মোডীক অৱগত কৰিবলৈ দিল্লীলৈ যাত্ৰা আৰম্ভ কৰিলে তিনিচুকীয়াৰ ৰাজেশ মহানন্দে । হাতত জাতীয় পতাকা লৈ তিনিচুকীয়াৰ ডুমডুমাৰ পৰা পদযাত্ৰা আৰম্ভ কৰিছে ৰাজেশে ।
ডুমডুমাৰ পৰা খোজকাঢ়ি আহি ১৪ দিনৰ অন্তত বুধবাৰে বঙাইগাঁৱত উপস্থিত হয় ৰাজেশ মহানন্দ । বঙাইগাঁৱৰ বীৰঝৰা চাহ বাগিচাত উপস্থিত হোৱাৰ পাচতে ৰাজেশক সম্ভাষণ জনায় আদিবাসী ছাত্ৰ সন্থাই । প্ৰায় ৩ মাহৰ অন্তত দিল্লীত উপস্থিত হ'ব বুলি আশা কৰিছে ৰাজেশে । আদিবাসী ছাত্ৰ সন্থাৰ লগতে আন লোকসকলেও তেওঁৰ এই যাত্ৰা সফল হোৱাৰ কামনা কৰিছে ।
লগতে আদিবাসী সকলৰ স্বাৰ্থত এই পদক্ষেপ গ্ৰহণ কৰাৰ বাবে তেওঁক ধন্যবাদ জ্ঞাপন কৰিছে । দিল্লীত উপস্থিত হোৱাৰ পাচত ৰাজেশে জনজাতিকৰণৰ মৰ্যাদা প্ৰদানৰ দাবীকে ধৰি কেইবাটাও দাবী সম্বলিত স্মাৰকপত্ৰ দিব প্ৰধানমন্ত্ৰী নৰেন্দ্ৰ মোডীক । যুৱকজনৰ এই প্ৰচেষ্টাৰ প্ৰতি সমৰ্থন আগবঢ়াবলৈ সকলোকে আহ্বান জনায় আদিবাসী ছাত্ৰ সন্থাই ।
লগতে পঢ়ক:হায় মানৱতা ! পিতৃ-মাতৃক নিৰ্দয়ভাৱে প্ৰহাৰ নিজ সন্তানৰ
