চিৰাং,24জুলাই : ৰাজ্যত অব্যাহত আছে ভৰ বাৰিষাৰ বানৰ বিভীষিকা ৷ তাৰ মাজতে আই নদীয়ে সৰ্বস্বান্ত কৰিছে চিৰাং জিলাৰ নেপালপাৰা গাঁও । আই নদীয়ে গতি সলাই গাঁওখনৰ মাজেৰে সোমাই যোৱাত ইতিমধ্য ৬২ টা পৰিয়ালৰ ঘৰ আই নদীৰ খহনীয়াত জাহ গৈছে । অঞ্চলটোত এতিয়াও খহনীয়া অব্যাহত আছে । এফালে আই নদী আনফালে নাঙলভাঙা নদীয়ে ক্ৰামান্বয়ে খহাইছে নেপালপাৰা গাঁওখন ৷
একপ্ৰকাৰ নদীদ্বীপত পৰিণত হৈ পৰা গাঁওখনত চাৰিওপিনৰ পৰা হোৱা বাঢ়নী পানী আৰু গৰাখহনীৰ ফলত নৈৰ বুকুত নিশ্চিহ্ন হোৱাৰ পথত এতিয়া গাঁওখন । ইয়াৰ লগে লগেই ডেবৰবিল, মাদাৰপুৰ, বুৰিঝাৰ, পলাংশুগুৰি , ছোটো আমগুৰি, ওদালগুৰি, ছৌৰাবাৰী, সন্যাসীবাৰী আদি গাঁওতো আগ নদীৰ গৰাখহনীয়াই ভয়ংকৰ ৰূপলোৱাত সৃষ্টী কৰা খহনীয়াত বহু লোক গৃহহীন হৈ আশ্ৰয় শিবিৰত আশ্ৰয় ল’ব লগীয়া হৈছে । একেদৰেই লাংকাৰ, মাক্ৰা, নাঙলভাঙা আদি নৈৰ খহনীয়াও ভয়ংকৰ ৰূপ ধাৰণ কৰিছে ।
প্ৰায় এমাহজুৰি হোৱা বান আৰু গৰাখহনীয়াত চিৰাং জিলাৰ বৃহৎ অংশ ক্ষতিগ্ৰস্ত হৈছে । তাৰ বিপৰীতে এতিয়াও পৰ্যাপ্ত পৰিমাণে সাহায্য লাভ নকৰাৰ অভিযোগ কৰিছে বন্যাৰ্তই ।
ইপিনে পশুখাদ্য আৰু বন্যাৰ্তৰ খাদ্য যোগানতো ব্যৰ্থ হৈছে বুলি অভিযোগ কৰিছে বানাক্ৰান্তই জিলা প্ৰশাসনৰ বিৰুদ্ধে । তাৰোওপৰি বিটিচিত নিৰ্বাচনী আচৰণবিধি বলবৎ থকা আৰু ৰাজ্যপালৰ শাসন প্ৰৰৰ্বতণ হৈ থকাৰ ফলত বন্যাৰ্তই উপযুক্ত সাহাৰ্যলাভৰ পৰা বঞ্চিত হোৱাৰ অভিযোগ উত্থাপন হৈছে ।
লগতে পঢ়কঃ গুৱাহাটীৰ বিভিন্ন স্থানত আৱকাৰীৰ চুলাই বিৰোধী অভিযান
