চিৰাং, 2 জুলাই : চৰকাৰৰ নতুন ভূমি নীতিক লৈ চলিছে নতুন বিতৰ্ক ৷ সদৌ অসম ছাত্ৰ সন্থাৰ আহ্বান মৰ্মে ৰাজ্যৰ অন্যান্য প্ৰান্তৰ লগতে চিৰাং জিলাৰ বিজনীতো আছুৱে ভূমিনীতি সিদ্ধান্তৰ প্ৰতিলিপি দাহ কৰি প্ৰতিবাদ সাব্যস্ত কৰে ৷ বিজনী আঞ্চলিক আছুৰ উদ্যোগত ৰূপায়িত এই প্ৰতিবাদী কাৰ্যসূচীত প্ৰতিবাদকাৰী সকলে ভূমি নীতি সিদ্ধান্তৰ প্ৰতিলিপি দাহন কৰি অসম চৰকাৰ হায় হায়, ভূমিনীতি মানি লোৱা নহ'ব, বিজেপি চৰকাৰ হায় হায় আদি শ্লোগান দি প্ৰতিবাদস্থলী উত্তাল কৰি তোলে ।
ক্ষুদ্ৰ, লঘু আৰু মজলীয়া উদ্যোগক লাভান্বিত কৰাৰ বাবে গ্ৰহণ কৰা এই ভূমি নীতি খিলঞ্জীয়াৰ ভূমি বহিৰাগত বণিয়াৰ হাতলৈ যোৱাত সহায়ক হ'ব বুলি দাবী তুলিছে বিভিন্নজনে ৷ 'কা' আন্দোলনৰ সময়ত চৰকাৰে খিলঞ্জীয়াৰ ভূমি সুৰক্ষিত কৰাৰ বাবে দুখন আইন প্ৰণয়ন কৰাৰ যি প্ৰতিশ্ৰুতি প্ৰদান কৰিছিল, সেই প্ৰতিশ্ৰুতি পাহৰি এতিয়া বহিৰাগত বণিয়াগোষ্ঠী আৰু ভূ-মাফিয়াক ৰঙা দলিছা পাৰি দিয়াৰ অভিযোগ উঠিছে ৷
জাতি-মাটি-ভেটিৰ কথা কৈ শাসনৰ গাদীত বহা সৰ্বানন্দ সোণোৱাল নেতৃত্বাধীন চৰকাৰখনে খিলঞ্জীয়াৰৱ প্ৰতি কৰা এনে অন্যায়ক তীব্ৰ ভাষাৰে গৰিহণা দিছে বিৰোধী দল, আছু আৰু বিভিন্ন সচেতন লোকে ৷
লগতে পঢ়ক : চৰকাৰৰ বিৰোধী শ্লগানেৰে উত্তাল মাৰ্ঘেৰিটাৰ ৰাজপথ
