মোডী পূজাৰ প্ৰতিযোগিতাত সৰ্বানন্দ-হিমন্ত : তৰুণ গগৈ

প্ৰাক্তন মুখ্যমন্ত্ৰী তৰুণ গগৈৰ আক্ৰমণ বৰ্তমানৰ মুখ্যমন্ত্ৰী সৰ্বানন্দ সোণোৱাল আৰু বিত্তমন্ত্ৰী হিমন্ত বিশ্ব শৰ্মাক৷ মোডীৰ পূজা কৰাক লৈ প্ৰতিযোগিতাত নামিছে দুই নেতা । কোনে বেছিকৈ মোডীক পূজা কৰিব পাৰে ইয়াৰে প্ৰতিযোগিতা চলিছে দুয়োৰে মাজত ৷

গুৱাহাটী, 25 এপ্ৰিলঃ বৃহস্পতিবাৰে এক সংবাদমেল আয়োজন কৰি প্ৰাক্তন মুখ্যমন্ত্ৰী তৰুণ গগৈৰ কটাক্ষ মুখ্যমন্ত্ৰী সৰ্বানন্দ সোণোৱাল আৰু বিত্তমন্ত্ৰী হিমন্ত বিশ্ব শৰ্মাক ৷ সোণোৱাল আৰু হিমন্ত এতিয়া মোডীক পূজা কৰাৰ প্ৰতিযোগিতাত নামিছে । কোনে বেছিকৈ মোডীক পূজা কৰিব পাৰে ইয়াৰে প্ৰতিযোগিতা চলিছে দুয়োৰে মাজত । বৰ্তমান বিজেপিৰ নেতা সকল অকল মোডীক পূজা কৰাত ব্যস্ত। মোডীক কোনে বেছি পূজা কৰিব পাৰে ইয়াৰে প্ৰতিযোগিতাত লাগিছে মুখ্যমন্ত্ৰী আৰু বিত্তমন্ত্ৰীৰ মাজত । কংগ্ৰেছে ইন্দিৰা গান্ধীক নেতা বুলি সন্মান কৰে যদিও বিজেপি ব্যক্তি পূজাত হে ব্যস্ত বুলি কটাক্ষ তৰুণ গগৈৰ । লগতে প্ৰধানমন্ত্ৰী নৰেন্দ্ৰ মোডীকো তীব্ৰ ভাষাৰে আক্ৰমণ কৰি গগৈয়ে কয় মোডীয়ে অক্ষয় কুমাৰক দিয়া সাক্ষাৎকাৰ নাটকৰ বাহিৰে একো নহয় । মোডীয়ে পাঁচ বছৰত কৰা নিজৰ কামৰ কথা উল্লেখ নকৰি অক্ষয় কুমাৰৰ লগত অকল নিজৰ ব্যক্তিগত জীৱনৰ কথাই উল্লেখ কৰিছে । নিজৰ পাঁচ বছৰৰ কাৰ্যকালৰ সফলতা ৰাইজৰ আগত দাঙি ধৰাৰ বিপৰীতে তেওঁক কোনে মিঠাই দিছে, কোনে আম দিছে এইবোৰ কথাই সাক্ষাৎকাৰত উল্লেখ কৰিছে বুলি কয় প্ৰাক্তন মুখ্যমন্ত্ৰীগৰাকীয়ে ৷ আনহাতে নিৰ্বাচনী আয়োগৰ ভূমিকাক সমালোচনা কৰি নিৰ্বাচনী আয়োগক মেৰুদণ্ডহীন বুলি আখ্যা দিয়ে তৰুণ গগৈয়ে ৷

আৰু পঢ়ক: সাংবাদিকৰ ৰূপত বলীউদৰ অভিনেতা অক্ষয় কুমাৰঃমোডীৰ সৈতে বিশেষ সাক্ষাৎকাৰ

ইপিনে ১৪ টা লোকসভা সমষ্টিৰ ভিতৰত কংগ্ৰেছে ৮ খন আসন লাভ কৰিব বুলি আশাবাদী তৰুণ গগৈ । কংগ্ৰেছ দলে নাগৰিকত্ব সংশোধনী বিধেয়ক বিষয়টো সঠিক ভাবে ৰাইজৰ মাজত লৈ যাবলৈ সম্পূৰ্ণ ৰূপে সক্ষম নোহোৱাৰ ফলতেই কংগ্ৰেছ দলৰ ভোট কিছু কম হ'ব পাৰে । কংগ্ৰেছৰ লগতে বিভিন্ন দল-সংগঠনেও নাগৰিকত্ব সংশোধনী বিধেয়ক বিষয়টো সঠিক ভাবে ৰাইজৰ মাজত লৈ যাবলৈ সম্পূৰ্ণৰূপে সক্ষম হোৱা নাই । কংগ্ৰেছ দলে সদায় নাগৰিকত্ব সংশোধনী বিধেয়ক বিৰুদ্ধে থাকিব আৰু প্ৰয়োজন হ’লে তীব্ৰ আন্দোলন কৰিব বুলি কয় প্ৰাক্তন মুখ্যমন্ত্ৰী তৰুণ গগৈয়ে ৷