শিলচৰ, 10 মে' : প্ৰায় তিনি কোটি টকা আত্মসাৎৰ অভিযোগত নিলম্বিত শিলচৰ মেডিকেল কলেজৰ প্ৰাক্তন অধ্যক্ষ ডাঃ অনিন্দসুন্দৰ বৈশ্যক গ্ৰেপ্তাৰ ৷ এই বৃহৎ ধন আত্মসাৎৰ অভিযোগতেই গ্ৰেপ্তাৰ কৰা হয় প্ৰাক্তন অধ্যক্ষগৰাকীক ৷ শিলচৰ মেডিকেল কলেজত বিগত বহু বছৰ ধৰি খোৱা বস্তু ক্ৰয়, সৰবৰাহ আৰু প্ৰদানৰ নামত লক্ষ লক্ষ টকা আত্মসাৎ, চিকিৎসালয়ৰ বিভিন্ন সামগ্ৰী, যন্ত্ৰপাতি ক্ৰয়ত মোটা টকা আত্মসাৎ, বিভিন্ন মাচুল নিজৰ নামৰ একাউন্টত জমা কৰাকে ধৰি বিভিন্ন বিষয়ত আৰক্ষীয়ে তদন্ত চলাই বৃহস্পতিবাৰে নিশা গ্ৰেপ্তাৰ কৰে ডাঃ বৈশ্যক ৷ ইয়াৰ পূৰ্বে এই একেই বিষয়তে পাপ্পু ৰবি দাস আৰু এ. তাঁতী নামৰ দুজন অস্থায়ী কৰ্মীক আটক কৰিছিল আৰক্ষীয়ে ৷
ইপিনে বৃহস্পতিবাৰে আটক কৰা ডাঃ বৈশ্যক শুকুৰবাৰে কাছাৰ মুখ্য ন্যায়াধীশৰ আদালতত হাজিৰ কৰোৱা হয় আৰু আদালতে তদন্তৰ বাবে দুদিনলৈ আৰক্ষীৰ জিম্মালৈ প্ৰেৰণ কৰে বৈশ্যক ৷
