মাণিকপুৰ, ১৩ ছেপ্টেম্বৰ: বঙাইগাঁও জিলাৰ মাণিকপুৰ মুকলি বজাৰ গৃহত আজি চি পি আই এমৰ মাণিকপুৰ আৰু পাতিলাদহা আঞ্চলিক সমিতিৰ উদ্যোগত অৱস্থান ধৰ্মঘট ৰূপায়ন কৰা হয় । মাণিকপুৰক উপ-জিলাৰ সদৰ ঘোষণা কৰাৰ লগতে পেট্ৰ'ল-ডিজেলৰ উপৰি অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰা, পুৰণি পেন্সন নীতি বাহাল ৰখা,ভেঞ্চাৰ শিক্ষানুষ্ঠান প্ৰাদেশিকীকৰণকে আদি কৰি ৯ টাকৈ দাবী পুৰণ কৰাৰ বাবে অৱস্থান ধৰ্মঘট ৰূপায়ণ কৰে ।
প্ৰতিবাদকাৰীসকলে শাসনাধিষ্ঠ বিজেপি চৰকাৰৰ জনবিৰোধী নীতি আৰু চৰম ব্যৰ্থতাৰ বাবে দেশৰ গৰিষ্ঠ সংখ্যক মানুহ চৰম দুৰ্দশাৰ কৱলত পৰিছে । সাম্প্ৰতিক সময়ত জনসাধাৰণক ভয়াবহ মূল্যবৃদ্ধিয়ে জুৰুলা কৰিছে । দুখীয়া আৰু সীমিত আয়ৰ পৰিয়ালবোৰৰ বাবে দৈনন্দিন প্ৰয়োজনীয় সামগ্ৰীখিনি যোগাৰ কৰাটো অসম্ভৱ হৈ পৰিছে । তেওঁলোকে পুনৰ কয় যে ভয়াৱহ মূল্যবৃদ্ধিৰ পৰা জনসাধাৰণক সকাহ দিয়াৰ বাবে চৰকাৰে কোনো ধৰণৰ উদ্যোগ গ্ৰহণ কৰা পৰিলক্ষিত হোৱা নাই । ইয়াৰ বিপৰীতে কেন্দ্ৰীয় আৰু ৰাজ্য চৰকাৰে বৃহৎ ব্যৱসায়ীসকলক অবাধ লুন্ঠনৰ সুযোগ দিছে ।
প্ৰতিবাদকাৰীসকলে কয় যে বিজেপি নেতৃত্বাধীন চৰকাৰৰ আমোলত বৃহৎ বৃহৎ দুৰ্নীতিৰ অভিযোগ উত্থাপিত হৈ আছে । সম্প্ৰতি আদানি কেলেংকাৰীয়ে দেশৰ ৰাজনীতিত খলকনিৰ সৃষ্টি কৰিলেও চৰকাৰে অভিযোগৰ তদন্ত কৰিবলৈ অস্বীকাৰ কৰিছে । অসমৰ মুখ্যমন্ত্ৰীৰ পৰিয়ালৰ ভূমি কেলেংকাৰীৰ অভিযোগৰ কোনো তদন্ত নহ'ল । দুৰ্নীতিৰ বিৰুদ্ধে শূন্য সহনশীলতাৰ চৰকাৰী শ্লোগান বিৰাট ফাঁকিৰ বাদে আন একো নহয় । অসমৰ ভেঞ্চাৰ শিক্ষানুষ্ঠানসমূহৰ প্ৰাদেশিকীকৰণৰ বেলিকাও চৰকাৰে চৰম প্ৰতাৰণা কৰাহে পৰিলক্ষিত হ'ল । ঢাক ঢোল বজাই নিযুক্তি পত্ৰ বিতৰণৰ কাৰ্যসূচীৰে সমস্যাটো ঢাকি ৰাখিব বিচাৰিলেও কৰ্মক্ষেত্ৰত অসমৰ ২২ লাখ নিবনুৱাৰ ১ লাখকো নিযুক্তি দিব পৰা নাই । ক্ষুদ্ৰ ব্যৱসায়ীসকল ভয়াবহ সংকটৰ সন্মুখীন হৈছে । এনে খণ্ডৰ বহুলোকে জীৱিকাৰ পৰা বিতাৰিত হৈ পুনৰ কৰ্মসংস্থানহীন হৈছে ।
