উত্তৰ অভয়াপুৰী,6 এপ্ৰিলঃ পৰিৱৰ্তনৰ শ্ল'গানৰে শাসনৰ গাদী দখল কৰিছিল মুখ্যমন্ত্ৰী সৰ্বানন্দ সোণোৱালৰ নেতৃত্বত মিত্ৰজোঁটৰ চৰকাৰে ৷ ক্ষমতালৈ অহাৰ পাচতেই দুৰ্নীতি ৰোধৰ ক্ষেত্ৰত শূণ্য সহনশীলতা নীতি গ্ৰহণ কৰিছিল মুখ্যমন্ত্ৰীগৰাকীয়ে ৷ কিন্তু মুখ্যমন্ত্ৰীৰ এনে সদম্ভ ঘোষণাক বুঢ়া আঙুলি দেখুৱাই এতিয়াও একাংশ চৰকাৰী বিভাগত অবাধ হাৰত দুৰ্নীতি চলি থকাৰ গুৰুতৰ অভিযোগ উত্থাপন হৈছে ৷ শনিবাৰে উত্তৰ অভয়াপুৰীৰ কীৰ্তনপাৰাত চলি থকা কোটি টকীয়া পথ নিৰ্মাণ আঁচনিৰ বিৰুদ্ধে ৰাজপথত ওলাই আহিল একাংশ ৰাইজ তথা সংগঠন ৷ বিভাগীয় অভিযন্তাৰ সৈতে বুজাবুজিৰে কোনো ধৰণৰ ফলক নোহোৱাকৈ সমুদায় ধুন হৰলুকী কৰাৰ অভিযোগ ঠিকাদাৰ ৰুদ্ৰ পাঠকৰ বিৰুদ্ধে ৷
উল্লেখ্য যে, উত্তৰ অভয়াপুৰীৰ বৰঘোলাৰ পৰা গুনিয়ালগুৰিলৈ চৰাঞ্চলৰ ৰাইজৰ যাতায়তৰ সুবিধাৰ্থে প্ৰায় 25 কিঃমিঃ দৈৰ্ঘ্যৰ পকী পথ নিৰ্মাণৰ আঁচনি গ্ৰহণ কৰিছিল চৰকাৰে ৷ কিন্তু ৰাইজক অন্ধকাৰত ৰাখি কোনো ধৰণৰ ফলক ব্যৱহাৰ নকৰাকৈ উক্ত পথটোৰ নিৰ্মাণ কাৰ্য চলাই গৈছে ঠিকাদাৰ গৰাকীয়ে ৷ ঘটনাটো সন্দৰ্ভত উচ্চ পৰ্যায়ৰ তদন্তৰ লগতে বিভাগীয় অভিযন্তা তথা ঠিকাদাৰৰ বিৰুদ্ধে বিহিত ব্যৱস্থা গ্ৰহণৰ দাবী তুলিছে স্থানীয় ৰাইজে ৷
