অভয়াপুৰী, ২৩ মে': ৰাজ্যৰ আংশিক লক ডাউনে জুৰুলা কৰিছে কৃষকসকলক । বাৰীতে গেলিছে তেওঁলোকৰ উৎপাদিত শস্য । কপাঁলৰ ঘাম মাটিত পেলাই উৎপাদন কৰা শস্যবোৰ এতিয়া চকুৰ আগতে গেলি পচি যাব ধৰিছে । চৰকাৰৰ আংশিক ল'ক ডাউন এতিয়া এইসকল কৃষকৰ বাবে হৈ পৰিছে অভিশাপ । কিয়নো তেওঁলোকে উচিত মূল্য নোপোৱাত মূৰে কপাঁলে হাত দিবলগীয়া হৈছে কৃষকসকলে ।
বঙাইগাঁও জিলাৰ অভয়াপুৰীৰ অন্তৰ্গত ডুমুৰীয়া দ্বিতীয় খণ্ড গাঁৱৰ কৃষকসকলৰ বেঙেনা, বিলাহী, তিয়ঁহ আদি শাক-পাচলি বাৰীতে গেলি পচি নষ্ট হৈছে । কৰ'ণা মহামাৰীৰ পৰা হাত সাৰিবলৈ চৰকাৰে কেইবাটাও গুৰুত্বপূৰ্ণ নীতি-নিৰ্দেশনা জাৰি কৰিছে আৰু এই নতুন নিয়ম অনুযায়ী বজাৰ সমাৰ যি সময়সীমা নিৰ্ধাৰণ কৰি দিছে সেই নিৰ্ধাৰিত সময়ৰ ভিতৰত কিন্তু উৎপাদিত শাক-পাচলি সমূহ বিক্ৰী কৰাটো সম্ভৱ নহয় । যাৰ বাবে বিঘাই বিঘাই এইদৰে নষ্ট হ'ব ধৰিছে শাক-পাচলিসমূহ । মুঠৰ ওপৰত কৃষকসকলে কষ্টৰে উৎপাদন কৰা সামগ্ৰীসমূহৰ যথোচিত ব্যৱস্থা যাতে অথলে নাযায় তাৰ বাবে চৰকাৰক দাবী জনাইছে ভুক্তভোগী কৃষকসকলে ।
লগতে পঢ়ক: শিলঘাটত চপৰা চপৰে খহিছে লুইতৰ গৰা
