বিশ্বনাথ, ১১ জুলাই : গহপুৰ মহকুমাত বাঢ়নী পানীয়ে কালৰূপ ধাৰণ কৰিছে । এফালে পাহাৰীয়া নৈ ব্ৰহ্মাজান, চত্ৰং, চেঁচা নৈৰ তাণ্ডৱ আনফালে ব্ৰহ্মপুত্ৰৰ বাঢ়নী পানীয়ে নিদ্ৰা হৰিছে ৰাইজৰ । বহু গাঁও পানী তলত থকাৰ লগতে বহু বান্ধ ছিঙি নিয়াৰ উপক্ৰম হৈছে গহপুৰ মহকুমাত ।
বিশেষকৈ চত্ৰং নৈৰ জলস্তৰ কিছু অধিক হ’লেই গহপুৰ মহকুমাত ভয়ংকৰ বানৰ পৰিস্থিতি সৃষ্টি হোৱা সম্ভাৱনা আছে । গহপুৰ অঞ্চলৰ পিছলা, লোহিত মুখ, ৰাওনা মুখ, খাৰুপৰীয়া, বৰতামুলী, বাকৰি দলনি গাঁও পঞ্চায়ত এলেকাৰ লগতে গহপুৰ বহু অঞ্চলৰ লোক সকলৰ ঘৰ-বাৰী, খেতি পথাৰ পুনৰ বাঢ়নী পানীৰ কৱলত পৰিছে । ইপিনে লোহিতমুখৰ পানীকচুৱা গাঁৱত এক অবৰ্ণনীয় পৰিস্থিতি পৰিলক্ষিত হৈছে । মানুহৰ লগতে জীৱ-জন্তুৰ একমাত্ৰ আশ্ৰয় স্থল হৈছে ওখ ঠাই । একেদৰে ৰাওনা মুখ, কলিয়াপানী, কাৱৈআত্ৰি, চ’গুৰি, চৰাইবাৰী, থুটে চাপৰি, গোপাল জাৰণি, নাম চৰাইবাৰী, বাহিৰ চৰাইবাৰী, লৌগুটি, সাধু চাপৰি, বাকৰি দলনি আদি এলেকাৰ বহু ঘৰ- বাৰী পানীৰ তলত ডুব গৈছে । আনহাতে গহপুৰত বানপানী হলেও একাংশ ঠিকাদাৰৰ বাবে গহপুৰ খন সোণৰ কণী পৰা হাঁহলৈ পৰিণত হৈছে । কিয়নো একাংশ ঠিকাদৰৰ বান্ধ নিৰ্মাণৰ নামত ইখনৰ পাচত সিখন বিল বনাই ৰাজহুৱা ধন খৰছ কৰি ধনে লুন্ঠন কৰাৰ অভিযোগ উত্থাপিত হৈছে । সেয়ে এই ক্ষেত্ৰত অনুসূচিত জাতি ছাত্ৰ সন্থা জাঙুৰ খাই উঠিছে ।
