বৰপেটা, 11 আগষ্টঃ পল্লা নদীত অঘটন ৷ নদীত গা ধুবলৈ গৈ সন্ধানহীন বৰপেটা ৰোডৰ দ্ৰোণাচাৰ্য একাডেমীৰ স্নাতক পঞ্চম ষাণ্মাসিকৰ ছাত্ৰ অজয় কুমাৰ চাহু ৷ সহপাঠী বন্ধু খুমদাম ব্ৰহ্মৰ সৈতে দেওবাৰে দুপৰীয়া বাইকেৰে পল্লা নৈৰ বেলগুৰি ঘাটত গা ধুবলৈ গৈছিল দুই বন্ধু ৷ খুমদামে নৈত নমাৰ পাছতেই নৈৰ প্ৰৱল সোঁতে খুমদাম ব্ৰহ্মক উটুৱাই নিয়াত বন্ধু অজয়ে উদ্ধাৰ কৰিবলৈ নদীত জাঁপ দিয়ে ৷ পিচত স্থানীয় লোকে প্ৰত্যক্ষ কৰি ততালিকে খুমদাম ব্ৰহ্মক উদ্ধাৰ কৰিবলৈ সক্ষম হয় যদিও দুৰ্ভাগ্যজনক ভাৱে পল্লাৰ নৈৰ প্ৰৱল সোঁতে বহু দূৰলৈ উটুৱাই নিয়ে অজয় কুমাৰ চাহুক ৷
আৰক্ষী আৰু এন ডি আৰ এফ বাহিনীক খবৰ দিয়াত উদ্ধাৰ অভিযান অব্যাহত ৰাখিছে যদিও উদ্ধাৰ কৰিবলৈ সক্ষম হোৱা নাই ছাত্ৰজনক ৷ সন্ধানহীন ছাত্ৰজনৰ ঘৰ শ্ৰীৰামপুৰত বুলি জানিব পৰা গৈছে ৷ উল্লেখ্য যে দুয়ো বন্ধুৱে বৰপেটা ৰোডৰ দ্ৰোণাচাৰ্য একাডেমিৰ ছাত্ৰাবাসত থাকি অধ্যয়ন কৰি আছিল ।
