বৰপেটা,১৭ মাৰ্চ: বুধবাৰে মনোনয়ন দাখিল কৰিলে কংগ্ৰেছৰ নেতৃত্বত গঠিত মহাজোঁট সমৰ্থিত চিপিআই(এম)ৰ প্ৰাৰ্থী মনোৰঞ্জন তালুকদাৰে । সৰভোগ সমষ্টিৰ পৰা প্ৰতিদ্বন্দ্বিতা কৰিব প্ৰাৰ্থীগৰাকীয়ে । বুধবাৰে জিলা উপায়ুক্তৰ কাৰ্যালয়ত মনোনয়ন দাখিল কৰে প্ৰাৰ্থীগৰাকীয়ে ।
মনোৰঞ্জন তালুকদাৰৰ মনোনয়ন দাখিলৰ পূৰ্বে বৰপেটা চহৰত এক বিশাল সমদল উলিওৱা হয় । কেইবা হাজাৰো কৰ্মীৰ সৈতে সৰভোগৰ পৰা গৈ বৰপেটা জিলা উপায়ুক্তৰ কাৰ্যালয়ত উপস্থিত হয় প্ৰাৰ্থীগৰাকী । আনহাতে, মনোনয়ন দাখিলৰ পূৰ্বেই মনোৰঞ্জন তালুকদাৰে নিজৰ নিশ্চিত বিজয়ৰ কথা সাংবাদিকৰ আগত প্ৰকাশ কৰে ৷
সৰভোগ সমষ্টিৰ ৰাইজে তেওঁৰ বাবে দুগুণ উৎসাহেৰে কাম কৰি আছে বুলিও তেওঁ মন্তব্য কৰে । চিপিআই(এম)ৰ প্ৰাৰ্থীগৰাকীয়ে সৰভোগৰ উন্নয়নৰ লগতে সৰভোগ মহকুমা গঠন, ডেইৰী কলেজ স্থাপন আদি বিষয়সমূহক ইছ্যু হিচাপে লৈ নিৰ্বাচনত অৱতীৰ্ণ হ'ব ৷
বিজেপিৰ ৰাজ্যিক সভাপতি ৰণজিৎ কুমাৰ দাসে "মেলা হ'ব" বুলি কৰা মন্তব্যৰো প্ৰতিক্ৰিয়া প্ৰকাশ কৰে মনোৰঞ্জন তালুকদাৰে ৷ তেওঁ কয় যে, "মেলা হ'ব" কিন্তু এই মেলা মহাজোঁটৰহে হ'ব ৷
লগতে পঢ়ক: বৰপেটাৰোডত জব্দ বৃহৎ পৰিমাণৰ নগদ ধন
